Միլանում կայանալիք բռնցքամարտի աշխարհի առաջնության ժամանակ, սեպտեմբերի 10-ին, մարզաձեւի եվրոպական ֆեդերացիայի գործկոմի նիստում պետք է որոշվի 2010-ի Եվրոպայի առաջնության կազմակերպիչ երկիրը: Մրցաշարի կազմակերպմանը հավակնում են Երեւանն ու Մոսկվան: Ըստ ՌԴ բռնցքամարտի ֆեդերացիայի գործադիր տնօրեն Վլադիմիր Սուրկովի, Մոսկվայի հաղթելու հնարավորությունները գերադասելի են, ինչն ընդունում են նաեւ Հայաստանի բռնցքամարտի ֆեդերացիայի ներկայացուցիչները: Բայց ամեն դեպքում մրցավայրը պետք է որոշվի քվեարկությամբ:
Հիշեցնենք, որ բոլորովին վերջերս Երեւանի մարզահամերգային համալիրում մեծ հաջողությամբ կազմակերպվեց բռնցքամարտի աշխարհի պատանեկան առաջնությունը, որում հիանալի հանդես եկան հայ բռնցքամարտիկները: Միջազգային ֆեդերացիայի ներկայացուցիչներն ու մասնակիցները գոհ էին մնացել մրցաշարի կազմակերպումից: Այնպես որ Երեւանն արդեն նման խոշոր մրցաշարերի կազմակերպման փորձ ունի, եւ կարծում ենքՙ քվեարկության ժամանակ դա հաշվի կառնվի:
ԱՇՈՏ ՀԱՅՐԱՊԵՏՅԱՆ