Հայաստանի հավաքականի եւ «Փյունիկի» կիսապաշտպան Լեւոն Փաչաջյանը մոտ երկու տարվա ընդմիջումից հետո վերադարձել է հարազատ կոլեկտիվ: Շվեդական ԳԱԻՍ-ը, որի հետ հայ ֆուտբոլիստը 2008-ի սկզբին քառամյա պայմանագիր էր կնքել, Լեւոն Փաչաջյանին ազատ ֆուտբոլիստի կարգավիճակ է շնորհելՙ չեղյալ համարելով գործող պայմանագիրը:
Ինչպես արդեն տեղեկացրել էինք, 2007-ի Հայաստանի լավագույն ֆուտբոլիստին ԳԱԻՍ-ը չէր հայտավորել Շվեդիայի այս տարվա առաջնությանը: Այնպես որ գարնանը նորվեգական «Ֆրեդրիկստադից» վերադառնալով Շվեդիա, Փաչաջյանը ստիպված էր լինելու մինչեւ հունվար խաղադաշտ դուրս չգալ: Իսկ ԳԱԻՍ-ը, որն առանց այդ էլ ֆինանսական դժվարություններ ուներ, ստիպված պետք է լիներ վճարել Փաչաջյանի աշխատավարձը: Եվ ահա շվեդական ակումբի ղեկավարությունը Փաչաջյանի հետ խորհրդակցելով, որոշեց չեղյալ համարել պայմանագիրը:
Ճիշտ է, վերադառնալով «Փյունիկ», Փաչաջյանը զրկված կլինի նաեւ Հայաստանի առաջնությանը մասնակցելուց, քանի որ տրանսֆերային շրջանում նա հայկական ոչ մի ակումբում գրանցված չէր, ուստի չի կարող այժմ հայտավորվել: Ամեն դեպքում, Լեւոնը սկսել է մարզվել «Փյունիկի» կազմում: Չնայած ՀՀ հավաքականի գլխավոր մարզիչ Վարդան Մինասյանը հայտարարել էր, որ մեր ընտրանու կազմում չի ընդգրկի խաղային փորձ չունեցող ֆուտբոլիստների, սակայն նա Փաչաջյանին հայտավորել էր Բելգիայի հավաքականի հետ հանդիպմանը: