Սեպտեմբերի 29-ին ԵՊՀ մեծ դահլիճում տեղի կունենա ԵՊՀ 90-ամյակին նվիրված գրքերի շնորհանդես, նույն օրը կենտրոնական մասնաշենքում կբացվի ԵՊՀ ուսանողների եւ դասախոսների լուսանկարչական,գեղանկարչական աշխատանքների ցուցահանդես:
«Երեւանի պետական համալսարան» գիրք-ալբոմում ներկայացված են ԵՊՀ բոլոր ֆակուլտետներն ու ստորաբաժանումները:
Հրատարակվել է նաեւ «Երեւանի պետական համալսարան. տարեգրություն», որը համալսարանի առաջին ամբողջական պատմությունն է, 1919-2009 ժամանակահատվածը ներառող:
Մայր բուհի նախկին եւ ներկա անվանի համալսարանականների կենսագրական տվյալներն է ներկայացնում «Երեւանի պետական համալսարան. կենսագրական հանրագիտարան»-ը:
«Սրտի խոսք» ժողովածուն ներառում է տարբեր հայտնի մարդկանց` համալսարանին ուղղված խոսքերը:
Տպագրված են նաեւ մի շարք այլ ժողովածուներ` համալսարանին նվիրված:
Միջոցառման ընթացքում տեղի կունենա համալսարանական պարգեւների եւ հուշամեդալների հանձնման արարողություն: Համալսարանական պարգեւներ կստանան ԵՊՀ պրոֆեսորադասախոսական կազմի ներկայացուցիչներ, բուհի աշխատակիցներ:
ՀՈՎԻԿ ԱՖՅԱՆ