Թուրքիայի Աքհիսար քաղաքում մեկնարկել է մինչեւ 16 տարեկանների շախմատի համաշխարհային օլիմպիադան, որի պարգեւներն են վիճարկում 22 հավաքականներ: Ընդ որում թուրքերը ներկայացրել են 6 թիմ, Լիբիան եւ Հարավաֆրիկյան Հանրապետությունը` 2-ական թիմեր:
Շախմատասերներին տեղեկացնենք, որ 1998-ին Ստամբուլում Հայաստանի պատանեկան հավաքականը, որի կազմում էին Լեւոն Արոնյանը, Գաբրիել Սարգսյանը, Տիգրան Լ. Պետրոսյանն ու Վարուժան Հակոբյանը, նվաճել էր օլիմպիադայի չեմպիոնի տիտղոսը:
Մեր պատանի շախմատիստները հաջող մեկնարկեցին` 3-1 հաշվով պարտության մատնելով «Թուրքիա-սպիտակներ» թիմին: Հաղթանակներ տարան Հայկ Վարդանյանը, Ռոբերտ Աղասարյանն ու Տիգրան Ս. Պետրոսյանը, իսկ Վահե Բաղդասարյանը զիջեց մրցակցին: Հաջորդ տուրում հայ շախմատիստները 3,5-0,5 հաշվով առավելության հասան Թուրքիայի մեկ այլ թիմի` «Սպիտակ աղջիկների» նկատմամբ: Միակ կես միավորը մրցակցին զիջեց Ռոբերտ Աղասարյանը, իսկ Հայկ Վարդանյանը, Վահե Բաղդասարյանը եւ Տիգրան Ս. Պետրոսյանը հաղթեցին: 3-րդ տուրում էլ վիճակահանությամբ մեր հավաքականի մրցակիցները թուրքերն էին` «Փիրուզագույնները»: Այս անգամ գրանցվեց ոչ-ոքի: Առաջին խաղատախտակի վրա մրցաշարում իր անդրանիկ հանդիպումը ոչ-ոքի ավարտեց մեր թիմի առաջատար Սամվել Տեր-Սահակյանը: Նրա մրցակիցը ՖԻԴԵ-ի վարպետ Բուրակ Ֆիրատն էր: Մեր թիմին հաղթանակ պարգեւեց 2-րդ խաղատախտակի վրա հանդես եկած Հայկ Վարդանյանը` պարտության մատնելով Դեմրե Քերիգանին: Պետրոսյանը ոչ-ոքի խաղաց Կատալկիլիսի հետ, իսկ Աղասարյանը պարտվեց Տոպակին:
4-րդ տուրում ՀՀ հավաքականը մրցաշարում անդրանիկ պարտությունը կրեց` 1,5-2,5 հաշվով զիջելով ռուսներին: Մեր թիմից միակ հաղթանակը տոնեց Սամվել Տեր-Սահակյանը` առավելության հասնելով Իվան Բուկավշինի նկատմամբ: Հայկ Վարդանյանը ոչ-ոքի խաղաց Դանիլ Դուբովի հետ, իսկ Վահե Բաղդասարյանն ու Ռոբերտ Աղասարյանը պարտվեցին համապատասխանաբար Վլադիմիր Բելոուսին ու Իլյա Իլյուշենկոյին:
4 տուրից հետո մրցաշարային աղյուսակը 8 միավորով գլխավորում է Հնդկաստանի հավաքականը, որը շահել է բոլոր մրցախաղերը: 7 միավորով 2-րդ տեղում ռուսներն են: 6-ական միավոր են վաստակել Ադրբեջանի ու Անգլիայի հավաքականները: Հայաստանի ընտրանին Վրաստանի, Հունգարիայի եւ Թուրքիայի երկու թիմերի հետ ունի 5 միավոր: Բոլոր պարտիաներում վաստակած միավորներով (10) մեր պատանիները 7-րդ տեղում են: