«ԱԶԳ» ՕՐԱԹԵՐԹ

ՔԱՐԱՄՅԱՆՆԵՐԸ ԶՐԿՎԵՑԻՆ ՀԱՋՈՐԴ ՓՈՒԼ ՄՏՆԵԼՈՒ ՀՆԱՐԱՎՈՐՈՒԹՅՈՒՆԻՑ

Ֆուտբոլի Եվրոպայի լիգայի խմբային մրցաշարի 4-րդ տուրի հանդիպումներից հետո չորս թիմեր` Դոնեցկի «Շախտյորը», գերմանական «Վերդերը», բելգիական «Անդերլեխտն» ու թուրքական «Գալաթասարայը» ժամկետից շուտ հաջորդ փուլի ուղեգիր նվաճեցին:

«A» խմբում հանդես եկող «Անդերլեխտի» ֆուտբոլիստները սեփական հարկի տակ 3-1 հաշվով պարտության մատնեցին ռումինական «Տիմիշոարային»: Արտավազդ Քարամյանը փոխարինվեց 80-րդ րոպեին, իսկ Արմանն այդպես էլ խաղադաշտ չմտավ, թեեւ պահեստայինների նստարանին էր: «Տիմիշոարան» 2 միավորով 3-րդ տեղում է եւ գրեթե կորցրել է ուղեգիր նվաճելու հնարավորությունը: 2-րդ ուղեգրին տիրելու լուրջ քայլ արեց «Այաքսը», որը մրցակցի դաշտում 2-0 հաշվով հաղթելով Զագրեբի «Դինամոյին», վաստակեց 8 միավոր:

«Թուլուզի» հետ արտագնա խաղում «Շախտյորին» բավարարում էր նույնիսկ ոչ-ոքին: Սակայն Միրչա Լուչեսկուի սաներն այդ խաղում էլ խաղացին հաղթանակի վճռականությամբ ու հաջողության հասան 2-0 հաշվով: «J» խմբում 2-րդ տեղում «Բրյուգեն» է, որը մրցակցի դաշտում 4-2 հաշվով հաղթեց «Պարտիզանին»:

«Լ» խմբում «Վերդերն» ուղեգրի հարցը ժամկետից շուտ վճռեց «Աուստրիայի» նկատմամբ տարած հաղթանակով (2-0): 2-րդ ուղեգրին հավակնող «Ատլետիկը» մրցակցի դաշտում ոչ-ոքի (1-1) խաղաց «Նասյոնալի» հետ: Թուրքական «Գալաթասարայն» էլ ժամկետից շուտ նվաճեց «F» խմբի ուղեգրերից մեկըՙ հյուրընկալվելիս 3 անպատասխան գնդակ ուղարկելով Բուխարեստի «Դինամոյի» դարպասը: 2-րդ ուղեգիրը նվաճելուն շատ մոտ է հունական «Պանատինաիկոսը», որը «Շտուրմի» հետ արտագնա խաղում հաղթեց Կացարանիսի խփած միակ գոլի շնորհիվ:

Բելառուսի ԲԱՏԷ-ն դեռեւս պահպանում է ուղեգիր նվաճելու հնարավորությունըՙ հյուրընկալվելիս ոչ-ոքի (2-2) ավարտելով հանդիպումը հունական ԱԵԿ-ի հետ: Բոլոր գոլերը խփվեցին առաջին խաղակեսում: Հովհաննես Գոհարյանն առողջական խնդիրների պատճառով Հունաստան չէր մեկնել: ԲԱՏԷ-ն «I» խմբում 4 խաղից հետո նույնքան միավորով 3-րդ տեղում է: Աղյուսակը 9 միավորով գլխավորում է «Բենֆիկան», որը մրցակցի դաշտում 2-0 հաշվով հաղթեց անգլիական «Էվերտոնին»: Վերջինս ունի 6 միավոր:

Մյուս խմբերում պայքարը ուղեգրերի համար եւս հասել է գագաթնակետին: Ներկայացնում ենք մնացած հանդիպումների արդյունքները. «Սլավիա»-«Վալենսիա»ՙ 2-2, «Ջենոա»-«Լիլ»ՙ 3-2, «Համբուրգ»-«Սելթիկ»ՙ 0-0, «Ռապիդ»-«Հապոել»ՙ 0-3, «Սպորտինգ»-«Վենտսպիլս»ՙ 1-1, «Հերենվեն»-«Հերտա»ՙ 2-3, «Ռոմա»-«Ֆուլհեմ»ՙ 2-1, «Բազել»-ԲԿՄԱ (Սոֆիա)ՙ 3-1, «Լեւսկի»-«Զալցբուրգ»ՙ 0-1, «Վիլյառեալ»-«Լացիո»ՙ 4-1, «Տվենտե»-«Շերիֆ»ՙ 2-1, «Ֆեներբահչե»-«Ստյաուա»ՙ 3-1, «Կոպենհագեն»-«Էյնդհովեն»ՙ 1-1, ՉՖՌ-«Սպարտա»ՙ 2-3:

ԱՇՈՏ ՀԱՅՐԱՊԵՏՅԱՆ