«Ժառանգության» խորհրդարանական խմբակցության անդամ Լարիսա Ալավերդյանն իր նախագծում առաջարկում էր ստեղծել 2008 թ. մարտի 1-2-ի իրադարձությունները եւ դրանց պատճառներն ուսումնասիրող նոր խորհրդարանական հանձնաժողով: Նախագիծը ԱԺ հանձնաժողովներում քննարկման ժամանակ դրական եզրակացություն չէր ստացել եւ երեկ էլ ԱԺ հերթական քառօրյայի օրակարգ չմտավ` 71 դեմ, 25 կողմ եւ 3 ձեռնպահ ձայների քվեարկությամբ մերժվելով: Մինչդեռ ՀՅԴ առաջարկ-նախագիծը` մարտի 1-ի դեպքերը քննող ժամանակավոր հանձնաժողովի (արդեն գործունեությունը դադարեցրած) ավարտական զեկույցում արված առաջարկների մոնիտորինգ իրականացնող հանձնաժողով ստեղծելու մասին, ընդգրկվեց ԱԺ քառօրյայի օրակարգում: Լ. Ալավերդյանը նոր ԺՀ ստեղծելու առաջարկը լրագրողների հետ զրույցում հիմնավորեց նրանով, որ մարտի 1-2-ի իրադարձությունների ժամանակ զոհված մարդկանց սպանողները բացահայտված չեն, եւ բացահայտման անհրաժեշտությունը չի վերացել: