ԵՐԵՎԱՆ, 17 ՆՈՅԵՄԲԵՐ, ԱՐՄԵՆՊՐԵՍ: Երեւանի Աբովյան փողոցի վրա գտնվող պետհամալսարանի շենքի դիմացի զբոսայգում, որտեղ գտնվում է նաեւ աստղադիտարանը, տեղադրվել է աստղաֆիզիկոս, տեսական աստղաֆիզիկայի խորհրդային դպրոցի հիմնադիր, ԽՍՀՄ եւ ՀԽՍՀ գիտությունների ակադեմիաների ակադեմիկոս, Հայաստանի գիտությունների ակադեմիայի նախկին երկարամյա նախագահ Վիկտոր Համազասպի Համբարձումյանի (1908թ., Թբիլիսի-1996թ., Երեւան, թաղված է Բյուրականում) արձանը, եւ մոտ օրերս տեղի կունենա հանդիսավոր բացումը: Այն ունի 3 մ 20 սմ բարձրություն եւ տեղադրված է 80-սմ-անոց պատվանդանի վրա:
Քանդակի հեղինակն է ճանաչված հայ արձանագործ, Երեւանի Գեղարվեստի ակադեմիայի պրոֆեսոր Տարիել Հակոբյանը:
Ի դեպ, արձանը դրված է հեղափոխական-կուսակցական գործիչ Ղուկաս Ղուկասյանի (1899-1920թթ.)ՙ նախկինում դրված արձանի տեղում: