Վարչապետն այցելեց դեղերի եւ բժշկական փորձագիտական կենտրոն
Ներկայում ՀՀ-ում գրանցված է 4000 դեղորայք: Դրանց որակն ու արդյունավետությունը որոշելու համար, մինչ դեղերի վաճառքի թույլատրումը, պարտադիր տեղի է ունենում փորձաքննություն: Դեղերի եւ բժշկական տեխնոլոգիաների փորձագիտական կենտրոնը ստեղծվել է 1992-ին: Զբաղվում է դեղերի եւ սարքավորումների ուսումնասիրմամբ, կատարում հետազոտություններ եւ ներկայացնում եզրակացություն: Կենտրոնի տնօրեն Էմիլ Գաբրիելյանի հավաստմամբ իրենց աշխատանքի նպատակն է բնակչությանն ապահովել որակյալ դեղերով եւ համապատասախան տեղեկատվությամբ:
Երեկ կենտրոն այցելած ՀՀ վարչապետ Տիգրան Սարգսյանի բնութագրմամբ կենտրոնի դերը բացառիկ է, տարածաշրջանի լավագույն կառույցներից է` հագեցած ժամանակակից տեխնիկայով: «Սակայն ամենակարեւոր արժեքը կայանում է նրանում, որ այս կենտրոնն ունի միջազգային ստանդարտներին համապատասխանող փորձագետներ: Դա է երաշխիքը, որ ազգային անվտանգության խնդիրների ամբողջական պահպանության վերաբերյալ կարող ենք վստահ լինել, քանի որ Հայաստան ներմուծվող դեղերը անցնում են փորձաքննության այս կենտրոնում: Կառույցի առաքելությունն է շուկան պահպանել կեղծարարությունից: Փորձը ցույց է տվել, որ վերջին 10 տարվա ընթացքում կառույցը հայտնաբերել է նմանատիպ կեղծարարություններ` մաքրելով շուկան վտանգավոր երեւույթներից»: Վարչապետը նկատեց, որ ապագայի խնդիրները բազմաթիվ են: Անհրաժեշտ են ժամանակից սարքավորումներ, որպեսզի կենտրոնը կարողանա համընթաց քայլել աշխարհում տեղի ունեցող նորարարությունների հետ: «Կարեւոր է, որպեսզի փորձագետներն անցնեն համապատասխան վերապատրաստում, կարեւոր է ոլորտում մասնագետների աշխատավարձի բարձրացումը: Շենքային պայմանները չեն բավարարում ժամանակակից պահանջներին», ասաց Տիգրան Սարգսյանը` հավելելով, որ խնդիրները գտնվում են կառավարության ուշադրության կենտրոնում:
Հատկապես, խոզի գրիպի վարակի ներթափանցման հետ կապված, հանրապետությունում կտրուկ աճել է դեղորայքի բիզնեսը: Վերջին օրերին մրսածության դեմ դեղամիջոցների ու դիմակների գները տասն անգամ թանկացել են: Վարչապետը նշեց, որ տնտեսական մրցակցության հանձնաժողովը քննության է վերցրել խնդիրը: «Դեղորայքիՙ շուկայում ստեղծված իրավիճակը մտահոգիչ է: Տեղի է ունենում կենտրոնացվածության աստիճանի աճ: Ներկրողների քանակը, որոնք գերիշխող դիրք ունեն դեղերի շուկայում ավելանում են, ներմուծված ինվոյսային(հաշիվ ապրանքագիր) գների եւ վաճառքի գների տարբերությունը երբեմն մի քանի անգամ բարձր է, շահութաբերությունն այդ ոլորտում բարձր է եւ պետություն այս առումով անելիք ունի»:
Կենտրոնում Տամիֆլյու դեղամիջոցը փորձաքննության է ենթարկվել երկու անգամ: Սովորաբար կենտրոնը դեղերը գրանցում է 5 տարով: Առաջին անգամ կենտրոնը Տամիֆլյուն գրանցել է 2005-ին, երկրորդը` 2009-ին: «Ազգ»-ի հետ առանձնազրույցում Դեղերի փորձագիտական կենտրոնի տնօրենի տեղակալ Լիլիթ Ղազարյանն ասաց, որ կենտրոնը խոզագրիպի դեմ պատվաստանյութի հայտեր է ստացել երկու ընկերությունից: Այժմ դրանք գտնվում են նախնական փորձաքննության փուլում: «Կառավարության որոշմամբ փորձաքննության համար նախատեսված է 180 օր, բայց քանի որ պատվաստանյութը համարվում է առաջնահերթ դեղ, հետեւաբար առավելագույնը երկու ամսից հայտնի կլինեն փորձաքննության արդյունքները: Կեղծված Տամիֆլյուի դեպքեր հանրապետությունում չենք հայտնաբերել, բայց հաղորդագրություն ենք ստացել Եվրոպական դեղերի որակի վարչությունից, որոնք արձանագրել են կեղծված Տամիֆլյուի դեպքեր»: Պատվաստանյութը կարող է մերժվել միայն այն ժամանակ, երբ չապացուցվի դրա արդյունավետությունն ու անվտանգությունը: «Բայց տվյալ դեպքում պատվաստանյութը գրանցվել է Եվրոպայում եւ ԱՄՆ-ում, հետեւաբար չեմ կարծում, որ կլինեն մերժման լուրջ պատճառներ, սակայն կստեղծվի տվյալների բազա եւ կանցկացվի փորձաքննություն», ասաց Լիլիթ Ղազարյանը:
ՀԱՍՄԻԿ ՀԱՐՈՒԹՅՈՒՆՅԱՆ