«ԱԶԳ» ՕՐԱԹԵՐԹ

ԽՈՇՈՐ ՀԱՇՎՈՎ ՀԵՐԹԱԿԱՆ ՊԱՐՏՈՒԹՅՈՒՆԸ

Ֆուտբոլի Հայաստանի կանանց ազգային հավաքականը շարունակում է իր անփառունակ ելույթներն աշխարհի առաջնության ընտրական մրցաշարում: Մեր հավաքականը 4-րդ անընդմեջ պարտությունը կրեցՙ Ֆինլանդիայում 0-7 հաշվով զիջելով դաշտի տերերին: Հիշեցնենք, որ նախորդ հանդիպումներում հայ ֆուտբոլիստուհիները պարտվել են ֆիններին (0-4), իտալուհիներին (0-8) եւ Սլովենիայի (1-5) հավաքականին: Մեր ընտրանին առանց միավորի, գնդակների 1-24 տարբերությամբ եզրափակում է ընտրական 7-րդ խմբի աղյուսակը: Իսկ առաջատարը ֆիններն են, որոնք հաղթել են բոլոր 4 հանդիպումներում էլ 15-0 ընդհանուր հաշվով:

2-րդ տեղը զբաղեցնում է Իտալիայի հավաքականը, որն անցկացրած 3 խաղերն էլ շահել է ընդհանուր 18-0 հաշվով: Պորտուգալիայի հավաքականն անդրանիկ հաղթանակը տոնեցՙ 4-0 հաշվով պարտության մատնելով Սլովենիայի հավաքականին: Երկու թիմերն էլ վաստակել են 3-ական միավոր:

ԱՇՈՏ ՀԱՅՐԱՊԵՏՅԱՆ