ԼՂՀ կառավարությունը երեկվա նիստում հավանության է արժանացրել 2010 թվականի պետբյուջեի նախագիծը: Համաձայն օրինագծի` եկամուտները կկազմեն 55 մլրդ 810,4 մլն դրամ, իսկ ծախսերը` 59 մլրդ 804,7 մլն դրամ: Պետբյուջեի պակասուրդը կկազմի 3 մլրդ 994,3 մլն դրամ: Մուտքերի աճը նախատեսվում է հարկերի ու պետական տուրքերի միջոցով, ինչպես նաեւ պարտադիր սոցիալական վճարների, պաշտոնական դրամաշնորհների եւ այլ եկամուտների հաշվին:
Կառավարության նիստը վարել է ԼՂՀ նախագահ Բակո Սահակյանը : Նախագահը գոհունակությամբ է նշել, որ այս տարի ապահովվում է շուրջ 13 տոկոս տնտեսական աճ, ինչը կառավարության վարած տնտեսական քաղաքականության արդյունք է, եւ կարեւորել է այն հանգամանքը, որ համաշխարհային ճգնաժամը խուճապային տրամադրություն չի առաջացրել բնակչության մեջ: Նախագահը տեղեկացրել է, որ Հայաստանի Հանրապետությունից ստացվող վարկի չափը գալիք տարում կավելանա: Երկրի ղեկավարը հատկանշել է երկու կարեւոր սկզբունք` միջոցները պետք է ծախսել առավելագույն արդյունավետությամբ եւ թույլ չտալ, որ ծախսերի որոշակի կրճատումը խոչընդոտի տնտեսական զարգացմանը:
Բակո Սահակյանը նաեւ դժգոհություն է հայտնել որոշ ոլորտներում առկա ստվերային երեւույթների կապակցությամբ, միաժամանակ անթույլատրելի համարելով պետական կառավարման համակարգում պաշտոնյաների թվի ուռճացումը: Նախագահը հաձնարարել է կառավարությանը վերանայել կառավարման համակարգը` անհրաժեշտ փոփոխություններ կատարելու շեշտադրումով:
Վերջում Բակո Սահակյանը վստահություն է հայտնել, որ երկրի գլխավոր ֆինանսական փաստաթղթով նախանշված` սոցիալական ուղղվածության ծրագրերի լիարժեք իրականացմամբ նկատելիորեն կբարելավվի մարդկանց կյանքի որակը:
Բյուջեի նախագծի շուրջն իր նկատառումներն արտահայտելովՙ վարչապետ Արա Հարությունյանը հավաստիացրել է, որ հանրապետության նախագահի հանձնարարականները լիովին կներառվեն կառավարության գործունեության ծրագրերում:
Հավանության արժանացած պետբյուջեի նախագիծը առաջիկայում կներկայացվի խորհրդարանի քննարկմանը:
ԿԻՄ ԳԱԲՐԻԵԼՅԱՆ, Ստեփանակերտ