Եվրոխորհրդարանը, որ Եվրոմիության կառույցներից է, վերջերս հանդես էր եկել Ադրբեջանի առնչությամբ քննադատական բանաձեւով` անդրադառնալով մեր հարեւան երկրում ազատ խոսքի եւ ազատ արտահայտվելու առումով առկա խնդիրներին: «Ազգն» արդեն տեղեկացրել է, որ դեկտեմբերի 17-ին Եվրոխորհրդարանը բանաձեւ էր ընդունել` ամենից առաջ դատապարտելով երկու բլոգերների ձերբակալությունը Ադրբեջանում:
Երեկ հարեւան երկրի արտաքին գերատեսչությունը հանդես է եկել հայտարարությամբ, մեկնաբանելով Եվրոխորհրդարանի մոտեցումն Ադրբեջանում ԶԼՄ-ների ազատության ու ընդհանրապես ուժային կառույցների ու լրատվության կապվածության վերաբերյալ: Մասնավորապես, ըստ «Թրենդ» գործակալության, Ադրբեջանի ԱԳՆ-ն հայտարարել է, թե Եվրոխորհրդարանը այդ քննադատող բանաձեւով հերթական անգամ հանդես է բերել կրկնակի ստանդարտների կիրառում:
Ադրբեջանի ԱԳՆ-ն հատկապես ընդգծել է, թե Եվրոխորհրդարանի այդ քայլը «կարող է գնահատվել որպես անհիմն գործողություն, որ կասկածի տակ է դնում Ադրբեջանի դատական համակարգի անկախությունը, արդարությունն ու անկողմնակալությունը»:
Հիշեցնենք, որ Եվրոխորհրդարանի պատգամավորները, նկատի ունենալով հատկապես Եվրոպական հարեւանության ծրագիրը, որն ընդգրկում է նաեւ Հարավային Կովկասի երկրները, մտահոգություն էին հայտնել Ադրբեջանում ազատ մամուլի վիճակի վատթարացման առնչությամբ ու դատապարտել էին ընդդիմադիր լրագրողների ձերբակալությունների, դատական հետապնդումների ու դատապարտման պրակտիկան` տարբեր պատճառաբանություններով ու մեղադրանքներով:
Ադրբեջանական ԱԳՆ-ի հայտարարության հաջորդ հատվածն ակներեւաբար ցույց է տալիս, թե ինչու է հատկապես ոտուձեռ ընկել հարեւան երկրի արտաքին գերատեսչական մարմինը: «Չնայած Ադրբեջանում ազատ խոսքի առումով վիճակը բնավ էլ չի տարբերվում տարածաշրջանի մյուս երկրներում առկա իրավիճակից ու անգամ որոշ ցուցանիշներով առաջ է, բայց հենց Ադրբեջանն է բախվում այդ խնդրին ավելի քննադատական մոտեցմամբ, ինչը հարցեր է ծնում», նշված է ԱԳՆ-ի հայտարարության մեջ:
Ա. ՀԱՐՈՒԹՅՈՒՆՅԱՆ