Ամերիկայի հայկական համագումարից տեղեկացնում են, որ դեկտեմբերի 19-ին եւ 20-ին ամերիկյան C-SPAN-2 հեռուստաալիքի BookTV Show հաղորդաշարը նվիրված է եղել ամերիկահայ լրագրող, իրավաբան Մայքլ Բոբելյանի հեղինակած «Հայաստանի զավակները» գրքին:
Աշխատությունն անդրադառնում է Օսմանյան կայսրությունում հայերի ցեղասպանությանն ու տեղահանմանը: Բոբելյանը, որը հենց ցեղասպանության հետեւանքով արտագաղթածների թոռ է, մեջբերելով 1915-ին ամերիկյան «Նյու Յուրք թայմս» թերթի ավելի քան հարյուր հոդվածները, որոնք անդրադառնում են ցեղասպանությանը, ինչպես նաեւ ԱՄՆ նախագահ Վուդրո Վիլսոնիՙ հայերին օգնելու հորդորներին, հարց է բարձրացնում, թե ինչո՞ւ մինչեւ այժմ պատմության այդ ժամանակահատվածը մնում է անտեսված: «Հայաստանի զավակները» գրքում Մայքլ Բոբելյանը նշում է նաեւ, որ հայերի ներկա սերունդը մեծ ջանքեր է գործադրում` պատմական իրողության միջազգային ճանաչման համար:
C-SPAN-2 հեռուստաընկերության կողմից «Հայաստանի զավակները» գրքին անդրադարձը նախաձեռնել է Կալիֆոռնիայի Սանտա Բարբարա քաղաքում գործող «Չոսերի գրախանութ»-ը: Հայոց ցեղասպանության նվիրված գրքի վերաբերյալ հաղորդումն ամերիկյան հեռուստաընկերությամբ հեռարձակվել է երեք անգամ` շաբաթ երեկոյան, կիրակի առավոտյան եւ երեկոյան:
Հ. Ա.