2010 թվականին կնշվի 65 տարին Հայրենական մեծ պատերազմում նվաճված հաղթանակի, որում իրենց արժանի տեղն ունեն եւ մեր ժողովրդի հարյուր հազարավոր զավակները: Բելառուսական ռազմաճակատի շիրակցի երեք տասնյակ վետերանների, ֆաշիստական զավթիչներից այս հանրապետության ազատագրման 65-ամյակի առթիվ, դեկտեմբերի 24-ին Գյումրիում հանդիսավոր կերպով հուշամեդալներ եւ շնորհակալագրեր է հանձնել ՀՀ-ում Բելառուսի դեսպան Նիկոլայ Սուխարենկոն:
«Մեզ համար այս գլխավոր պետական տոնը,- մասնավորապես ասված է Բելառուսի Հանրապետության նախագահ Ալեքսանդր Լուկաշենկոյի` վետերաններին ուղղված շնորհավորական ուղերձում,- խորհրդանշում է պատմական ժառանգորդությունը, արիությունը եւ հաղթանակող ժողովրդի անկոտրում ոգու ուժը: Մենք հոգատարությամբ ենք պահում Մեծ հայրենականի զինվորների - սպաների հիշատակը, աննման հերոսական սխրագործությունների հիշողությունը... Հուսով եմ, որ դուք դեռ երկար տարիներ կմնաք վետերանների մարտական շարքերում, քաղաքացիական պարտքին հավատարմության - ամրության օրինակ կծառայեք»:
Գ. Մ.