Երեկ Ազգային ժողովի փոխնախագահ Սամվել Նիկոյանն ընդունել է ԱՄՆ-ի պետդեպարտամենտի Հայաստանի հարցերով երկրորդ քարտուղար Ժոզեֆ Ֆառելլիին եւ Հայաստանում ԱՄՆ դեսպանատան քաղաքական-տնտեսական բաժնի ղեկավար Բարթ Փարթնիին: Հանդիպման ընթացքում քննարկվել են հայ-թուրքական հարաբերություններին, երկու երկրների խորհրդարաններում Արձանագրությունների վավերացմանն առնչվող հարցեր: Ս. Նիկոյանը խոսել է այն մասին, որ անհիմն է թուրքական կողմի այն տեսակետը, թե Հայաստանի ՍԴ որոշումը նախապայմաններ է պարունակում, քանի որ Արձանագրությունները երկկողմ հարաբերությունների են վերաբերում եւ կապ չունեն երրորդ կողմի հետ, իսկ ամերիկացի պաշտոնյաները նշել են, թե ստեղծվել է հայ-թուրքական հարաբերությունների հաստատման առումով պատմականորեն բարենպաստ իրավիճակ, եւ հույս են հայտնել, որ Հայաստանն ու Թուրքիան ջանքեր կգործադրեն ցանկալի հանգրվանին հասնելու համար: