«Ադրբեջանը շահագրգիռ է մադրիդյան սկզբունքների նորացված տարբերակի ընդունմամբ», երեկ այդ մասին հայտարարել է Ադրբեջանի ԱԳ նախարար Էլմար Մամեդյարովը ` ԵԱՀԿ գործող նախագահ, Ղազախստանի պետական քարտուղար-արտգործնախարար Կանատ Սաուդաբաեւի հետ համատեղ ասուլիսում:
Ադրբեջանական լրատվամիջոցների փոխանցմամբ, Մամեդյարովը նշել է. «Ես օրերս եմ զրուցել Ռուսաստանի ԱԳ նախարար Սերգեյ Լավրովի հետ, ու նա ասաց, որ հայկական կողմը մինչ օրս չի ներկայացրել իր առաջարկությունները` «հիմնարար սկզբունքների» չհամաձայնեցված պահերի առնչությամբ»: Ադրբեջանի ԱԳ նախարարը հերթական անգամ կրկնել է Ադրբեջանի դիրքորոշումը, թե «Լեռնային Ղարաբաղի ապագա կարգավիճակը տեսնում են միայն Ադրբեջանի կազմում` հայ եւ ադրբեջանական համայնքների համատեղ կյանքի պայմանով»:
Ասելով, թե ղարաբաղյան հակամարտության կարգավորման գործըթնացը տեղի ունի, Մամեդյարովն, այնուամենայնիվ, հայտարարել է, թե գործընթացի արգելակման դեպքում հարցը, թե ինչ կլինի հետո, իրենք իրենց պետք է տան բանակցությունների մասնակիցները:
Ա. Հ.