Անցած շաբաթ Արցախում էր ՀՀ սփյուռքի նախարարության պատվիրակությունը` նախարար Հրանուշ Հակոբյանի գլխավորությամբ:
Նախարարին ընդունել են ԼՂՀ նախագահ Բակո Սահակյանը եւ խորհրդարանի նախագահ Աշոտ Ղուլյանը : Հանդիպումների ընթացքում քննարկվել են սփյուռքի հետ կապերի ընդլայնմանը եւ խորացմանը վերաբերող հարցեր:
ԼՂՀ նախագահը միաժամանակ կարեւորել է հանրապետությունից դուրս ապրող արցախցիների հետ հարաբերությունների զարգացման խնդիրը:
Սփյուռքի նախարարին ընդունել է նաեւ ԼՂՀ փոխվարչապետ Սպարտակ Թեւոսյանը:
Կառավարության տեղեկատվության եւ հասարակայնության հետ կապերի վարչության տեղեկատվության համաձայն, հանդիպման ընթացքում մասնավորապես ընդգծվել է սփյուռքի նախարարության ծրագրերում Արցախն ընդգրկելու անհրաժեշտությունը: Հրանուշ Հակոբյանը պատրաստակամություն է հայտնել աջակցելու Ստեփանակերտի դրամատիկական թատրոնի շենքի վերակառուցման ծրագրին:
Նախարարությունը ծրագրեր կիրականացնի նաեւ տեղեկատվական դաշտում` գաղթօջախները ներգրավելով համապատասխան միջոցառումներում: Այս շրջանակում պայմանավորվածություն է ձեռք բերվել 2010 թվականին նախատեսվող` լրագրողների համաժողովի մեկնարկը տալ Ստեփանակերտում:
Կ. ԳԱԲՐԻԵԼՅԱՆ, Ստեփանակերտ