Խորվաթական Ռիեկա քաղաքում մեկնարկել են շախմատի Եվրոպայի կանանց եւ տղամարդկանց 11-րդ առաջնությունները: Մրցաշարն անցկացվում է շվեյցարական մրցակարգով, 11 տուրով: Բացի առաջնության պարգեւներից, շախմատիստները վիճարկում են նաեւ շախմատի աշխարհի գավաթի խաղարկության ուղեգրերը:
Տղամարդկանց մրցաշարի 406 մասնակիցների թվում են Հայաստանը ներկայացնող 13 շախմատիստներ: Անցկացված 3 տուրից հետո հայ շախմատիստներից լավագույն արդյունքն ունեն Գաբրիել Սարգսյանը, Տիգրան Պետրոսյանը, Հրանտ Մելքումյանը, Ավետիք Գրիգորյանն ու Ռոբերտ Հովհաննիսյանը, որոնք վաստակել են 2,5 միավոր:
Գաբրիելը մրցաշարը սկսեց Մաթիաս Վոմաչկայի հետ ոչ-ոքի արդյունքով, ապա հաղթեց Դրասկո Բոշկովիչին եւ Մերաբ Գագունաշվիլուն: Տիգրան Պետրոսյանն առավելության հասավ Ռոման Կոզլիտինի եւ Հենրիկ Դանիելսենի նկատմամբ ու հաշտություն կնքեց Պետեր Պրոխազկայի հետ:
2 միավոր ունեն Վլադիմիր Հակոբյանն ու Սամվել Տեր-Սահակյանը: Հակոբյանը մեկնարկեց Վլադիմիր Յակեմովի նկատմամբ տոնած հաղթանակով, ապա ոչ-ոքի խաղաց Նիկոլա Սեդլակի եւ Վալերի Պոպովի հետ: Սամվելը եւս առաջին տուրում հաղթեց Ջուլիանո Լանզանին, ապա հաշտություն կնքեց Ալեքսանդր Դելչեւի եւ Պավել Տրեգուբովի հետ:
1,5 միավոր են վաստակել Արման Փաշիկյանը, Զավեն Անդրեասյանը, Արտաշես Մինասյանը, Դավիթ Պետրոսյանը: Նրանց կես միավոր են զիջում Վահե Բաղդասարյանն ու Վլադիմիր Պողոսյանը: Մրցաշարային աղյուսակը 100 տոկոսանոց արդյունքով գլխավորում են 13 շախմատիստներ:
Կանանց մրցաշարում հանդես եկող 158 շախմատիստուհիներից հինգը ներկայացնում են Հայաստանը: Առայժմ բոլորից հաջողը Լիլիթ Գալոյանի ելույթն է, որն ունի 2,5 միավոր: Այս ցուցանիշով Լիլիթը 21-րդ տեղում է: Գալոյանը մեկնարկային տուրում հաղթեց ռուսաստանցի Տատյանա Բոգիմիլին, ապա ոչ-ոքի խաղաց Ռայնա Սարգասի հետ, իսկ 3-րդ տուրում պարտության մատնեց իսպանուհի Մոնիկա Գալզետային:
1,5-ական միավոր ունեն Լիլիթ Մկրտչյանը, Էլինա Դանիելյանը եւ Նելլի Աղինյանը, որոնց կես միավոր է զիջում Հայաստանի այս տարվա չեմպիոնուհի Անահիտ Խառատյանը: Մկրտչյանը հաղթեց Իրինա Սեմյոնովային, ապա պարտվեց Ելենա Սեդինային ու հաշտություն կնքեց Վիկտորիա Տարասովայի հետ: Էլինան եւս մրցաշարը հաղթանակով սկսեցՙ պարտության մատնելով Կատերինա Նեմցովային, ապա ոչ-ոքի խաղաց Սաբրինա Վեգայի հետ ու պարտվեց Ելենա Կոզմային:
Կանանց մրցաշարում 3 տուրից հետո աղյուսակը նույնքան միավորով գլխավորում են Մոնիկա Սոչկոն, Կետեւան Արախամիա-Գրանտը, Իրինա Չելյուսկինան եւ Տատյանա Կոսինցեւան:
ԱՇՈՏ ՀԱՅՐԱՊԵՏՅԱՆ