Շախմատի Եվրոպայի անհատական առաջնությունում Հայաստանի պատվիրակներից առայժմ բոլորից հաջող է ելույթ ունենում հանրապետության կրկնակի չեմպիոնուհի Լիլիթ Գալոյանը: 4-րդ տուրում Լիլիթը հաղթեց ռուսաստանցի Վալենտինա Գունինային եւ 3,5 միավորով ընդգրկվեց առաջատարների շարքում: Նույնքան միավոր են վաստակել նաեւ Կետեւան Արախամիա-Գրանտը, Վիկտորյա Չմիլիտեն, Աննա Մուզիչուկը, Էլմիրա Սկրիպչենկոն, Պիա Կրամլինգը եւ Տատյանա Կոսինցեւան:
Կանանց մրցաշարի առաջատարը լեհ Մոնիկա Սոչկոն է, որը 4-րդ անընդմեջ հաղթանակը տոնեցՙ պարտության մատնելով Իրինա Չելյուշկինային: Տուրը հաջող էր նաեւ Էլինա Դանիելյանի համար, որը հաղթեց իսպանուհի Մոնիկա Գալզետային: Էլինան ունի 2,5 միավոր: 2-ական միավոր են վաստակել Լիլիթ Մկրտչյանն ու Նելլի Աղինյանը, որոնք վիճակահանության քմահաճույքով 4-րդ տուրում մրցեցին միմյանց հետ: Գրանցվեց ոչ-ոքի: Առայժմ անհաջող է խաղում հանրապետության այս տարվա չեմպիոնուհի Անահիտ Խառատյանը: Նա մրցաշարում 3-րդ պարտությունը կրեցՙ զիջելով խորվաթ Մառա Ջելիցային: Խառատյանը վաստակել է 1 միավոր:
Տղամարդկանց մրցաշարում 3-ական միավոր են վաստակել Գաբրիել Սարգսյանը, Տիգրան Պետրոսյանը, Հրանտ Մելքումյանը, Սամվել Տեր-Սահակյանը եւ Ռոբերտ Հովհաննիսյանը: Նշված շախմատիստներից 4-րդ տուրում հաղթեց միայն Սամվել Տեր-Սահակյանըՙ պարտության մատնելով ռուսաստանցի Միխայիլ Կոբալիային: Սարգսյան-Լիսի, Պետրոսյան-Արեշչենկո, Մելքումյան-Գրաչով, Հովհաննիսյան-Բելով պարտիաներն ավարտվեցին ոչ-ոքի:
2,5 միավոր ունեն Վլադիմիր Հակոբյանը, Արտաշես Մինասյանը, Ավետիք Գրիգորյանը եւ Դավիթ Պետրոսյանը: Նրանցից կեսական միավորով հետ են մնում Արման Փաշիկյանը, Զավեն Անդրեասյանը եւ Վահե Բաղդասարյանը: Վլադիմիր Պողոսյանի օգտին գրանցված է մեկ միավոր:
Տղամարդկանց մրցաշարում երկիշխանություն է: 4-ական միավորով աղյուսակը գլխավորում են վրացի Բայադուր Ջոբավան եւ ուկրաինացի Զախար Եֆիմենկոն: Ջոբավան հաղթեց լեհ Միխալ Կրասենկովին, իսկ Եֆիմենկոն առավելության հասավ Արկադի Նայդիչի նկատմամբ: 15 շախմատիստներ 3,5 միավորով հետապնդում են առաջատարներին:
ԱՇՈՏ ՀԱՅՐԱՊԵՏՅԱՆ