Հայաստանի Հանրապետական կուսակցությունն այս տարի նշում է իր հիմնադրման 20-ամյակը: Հոբելյանական միջոցառումների մեկնարկը երեկ տրվեց, ՀՀԿ հիմնադիր եւ առաջին անդամատոմս ստացած, ազատատենչ ոգի, նվիրյալ հայրենասեր, ազգային-քաղաքական գործիչ Աշոտ Նավասարդյանի ծննդյան 60-ամյակին նվիրված, Արամ Սուքիասյանի «Նպատակներիս ծառը» փաստավավերագրական ֆիլմի ցուցադրությամբ:
Միջոցառմանը ներկա էին ՀՀ նախագահ, ՀՀԿ ղեկավար Սերժ Սարգսյանը, ԱԺ նախագահ Հովիկ Աբրահամյանը, ՀՀԿ անդամներ, հյուրեր: Ֆիլմում ներկայացված էր Աշոտ Նավասարդյանի խորհրդարանական գործունեությունը, 12 տարի քաղբանտարկյալ լինելու ընթացքը, նաեւ նրա մարտական գործողությունները, երբ նա հանդիսանում էր «Անկախության բանակի» հրամանատար: Ֆիլմը նվիրում եւ փաստացի մի հուշ է Աշոտ Նավասարդյանի հիշատակին: Նավասարդյանը ոչ միայն քաղաքական գործիչ էր, այլեւ հրաշալի ամուսին, հայր, ընտանիքին նվիրված անձ, որը անգամ բանտախցից բազմաթիվ ամսագրերից քաղվածքներ է արել, կտրատել դրանք եւ թիթեռնիկներ, ծաղիկներ է սարքել ու իր երեխաներին ուղարկել, որպես նվեր: Աշոտի թողած պատգամն այսօր իրականացնում են նրա կուսակիցները եւ ընտանիքը, որն էՙ «Ես եղել եմ եւ կամ ու խնդրում եմ ասե՛ք ժողովրդին, մենք ազգի մատաղացուն ենք, լավագույն մասը, արժանի լինենք մեր կոչմանը...»:
ՄԱՐԻԵՏԱ ՄԱԿԱՐՅԱՆ