Ռուսաստանի հայերի միությունը ապրիլի 23-ին եւ 24-ին ՌԴ մայրաքաղաքում կկազմակերպի մի շարք միջոցառումներ` նվիրված Հայոց ցեղասպանության զոհերի հիշատակին: Մոսկվայում կառուցվող Հայ առաքելական եկեղեցու տարածքում ապրիլի 23-ին կկազմակերպվի հատուկ արարողություն` «Ողջգիշերային հսկում»: Իսկ ապրիլի 24-ին ծաղկեպսակներ կդրվեն նույն տարածքում տեղադրված հայկական խաչքարի առջեւ, այնուհետեւ սգո պատարագ կլինի Հայ առաքելական եկեղեցու Ռուսաստանի եւ Նոր Նախիջեւանի թեմի առաջնորդ Եզրաս եպիսկոպոս Ներսիսյանի մասնակցությամբ: Երեկոյան Մոսկվայի Երաժշտության միջազգային տանը կկազմակերպվի երեկույթ` նվիրված Ցեղասպանության 95-ամյակին: