Հայաստանի Հանրապետության կենտրոնական բանկը շրջանառության մեջ է մտցրել նոր արծաթե հուշադրամ` նվիրված հոլանդացի ֆուտբոլիստ Յոհան Կրոյֆին: Հուշադրամը թողարկվել է «Համաշխարհային ֆուտբոլի արքաները» միջազգային ծրագրի շրջանակում:
Հուշադրամի դիմերեսի վերեւի կիսաշրջանում պատկերված է «KINGS OF FOOTBALL» մակագրությամբ եզրագծված թագ, որը պահպանում են երկու առյուծներ: Պատկերի ներքեւի մասում ֆուտբոլի գնդակ է: Ներքեւի կիսաշրջանում նշված է հուշադրամի անվանական արժեքը` «100 ԴՐԱՄ», որից ներքեւ Հայաստանի Հանրապետության զինանշանն է: Զինանշանի երկու կողմում թողարկման տարեթիվն է` ձախում «20», աջում` «10»: Զինանշանից աջ ներքեւում Լեհաստանի դրամահատարանի առեւտրային նիշն է: Եզրաշուրթի շրջագծով վերեւումՙ հայերեն, իսկ ներքեւում անգլերեն մակագրված են` «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» եւ «REPUBLIC OF ARMENIA»:
Հուշադրամի դարձերեսին հոլանդական դրոշի գունային ֆոնի վրա Յոհան Կրոյֆի դիմապատկերն է, որից ձախ ֆուտբոլի գնդակ է: Դիմապատկերից ձախ եզրաշուրթի մոտ ձեւավորող հեղինակի խորագիրն է: Ներքեւում եզրաշուրթի մոտ Յոհան Կրոյֆի ստորագրությունն է: Վերեւում եզրաշուրթի մոտ շրջագծով մակագրված է «JOHAN CRUYFF»:
Հուշադրամը շրջանագծով երկու կողմից ունի ուռուցիկ եզրաշուրթ:
Հուշադրամի պատրաստման ժամանակ օգտագործվել են գունավոր ներկեր:
Ուրվագծերի հեղինակն է Լեհաստանի դրամահատարանի դիզայներ Ռոբերտ Կոտովիչը: Հուշադրամը դրվագվել է Լեհաստանի դրամահատարանում:
Հուշադրամի բնութագիրը.
| Անվանական արժեքը | 100 դրամ |
| Մետաղը եւ հարգը արծաթ, | 925 + 50 |
| Զանգվածը | 28,28 + 0,25 գ |
| Տրամագիծը | 38,61 + 0,15 մմ |
| Որակը | պրուֆ |
| Դրամաշուրթը | հարթ |
| Տպաքանակը | մինչեւ 20000 հատ |
ԿԲ հասարակայնության հետ կապերի ծառայություն