Շարունակում են ավելանալ հիպոթեկային գործարքները
Անշարժ գույքի կադաստրի պետական կոմիտեիՙ շուկայի վերլուծության տվյալների համաձայն, 2010-ի մարտին Հայաստանի անշարժ գույքի շուկայում իրականացվել է 14951 գործարք, ինչը 11,4 տոկոսով բարձր է փետրվարի եւ 30,4 տոկոսովՙ 2009-ի մարտի գործարքների համեմատ: Միայն օտարման գործարքների քանակը մարտին փետրվարի համեմատ աճել է 18,7 տոկոսով, իսկ անցյալ տարվա մարտի համեմատՙ 35,7 տոկոսով: 3940 օտարման գործարքներից առուվաճառքներինը կազմել է 81,1 տոկոսը: Մնացածը նվիրատվություններն ու փոխանակություններն են: Անշարժ գույքի օտարման գործարքների քանակի 36,9 տոկոսն արձանագրվել է Երեւան քաղաքում:
Մայրաքաղաքում առուվաճառքի գործարքների 63,8 տոկոսն արձանագրվել է բազմաբնակարան շենքերի բնակարանների նկատմամբ: 2010-ի փետրվարի համեմատ, բնակարանների առուվաճառքի գործարքների քանակը Երեւանում մարտին աճել է 21,1 տոկոսով, իսկ նախորդ տարվա մարտի համեմատՙ 35,7 տոկոսով:
Բնակարանների շուկայական միջին գները Երեւանում այս տարվա մարտին փետրվարի համեմատ աճել ենՙ 1,4 տոկոսով: Ըստ վարչական շրջանների, Երեւանում բնակարանների 1 քմ մակերեսի միջին շուկայական գներն այսպիսին են եղել.
| Վարչական շրջաններ | Միջին գները (դրամ) մարտ 2009 թ. | Միջին գները (դրամ) մարտ 2010 թ. | Միջին գները (դրամ) փետրվար 2010 թ. |
| Կենտրոն | 515600 | 469200 | 469200 |
| Արաբկիր | 388400 | 380000 | 370800 |
| Քանաքեռ-Զեյթուն | 299100 | 286100 | 281200 |
| Նոր Նորք | 258600 | 237600 | 234400 |
| Ավան | 256700 | 239300 | 235700 |
| Էրեբունի | 271500 | 251400 | 246500 |
| Շենգավիթ | 264700 | 252200 | 247300 |
| Դավթաշեն | 279200 | 274000 | 269000 |
| Աջափնյակ | 254700 | 240500 | 240500 |
| Մալաթիա-Սեբաստիա | 245100 | 240300 | 235000 |
| Նուբարաշեն | 154700 | 144300 | 143500 |
| Միջինը Երեւանում (բացի Նորք-Մարաշից) | 289800 | 274100 | 270300 |
Մարզերում, բացառությամբ Երեւանի, մարտին վաճառվել են 367 բնակարաններ, որոնց քանակը փետրվարի համեմատ աճել է 19,5 տոկոսով, իսկ 2009-ի մարտի համեմատՙ 69,1 տոկոսով: Բնակարանների միջին գները փետրվարի համեմատ աճել են 0,8 տոկոսով:
Երեւանից հետո ամենաթանկ բնակարանները մարտին եղել են Ծաղկաձորում, որտեղ 1 քմ մակերեսի շուկայական գինը կազմել է ավելի քան 181 հազար դրամ: Աբովյանում 1 քմ գինը 160 հազար դրամ է կազմել, Վաղարշապատում (Էջմիածնում)ՙ 158 հազար դրամ: Ապա գալիս են Աշտարակըՙ 142 հազար դրամ, Գորիսըՙ 139 հազար դրամ, Իջեւանը ՙ 138 հազար դրամ, Մասիսըՙ 128 հազար դրամ 1 քմ դիմաց ցուցանիշներով:
2010-ի մարտին Հայաստանում գրանցվել է անհատական տների առուվաճառքի 425 գործարք, որից 116-ըՙ Երեւանում: Մայրաքաղաքում անհատական տների առուվաճառքի գործարքների քանակը 2010-ի փետրվարի համեմատ աճել է 56,8 տոկոսով, իսկ մարզերումՙ 4 տոկոսով: 2009-ի մարտի համեմատ անհատական բնակելի տների առուվաճառքի գործարքների քանակը Երեւանում աճել է 2,1 անգամ, իսկ մարզերում միասին վերցրածՙ 47,8 տոկոսով:
Միջինացվածՙ 250 քմ շինության մակերես եւ 400 քմ տնամերձ ունեցող անհատական տների 1 քմ-ի միջին գները (ներառյալ տնամերձի միավորի գինը) 2010-ի մարտին փետրվարի համեմատ աճել են 1 տոկոսով: Ըստ Երեւանի վարչական շրջանների, գներն այսպիսին են եղել.
| Վարչական շրջաններ | Միջին գները (դրամ) մարտ 2009 թ. | Միջին գները (դրամ) մարտ 2010 թ. | Միջին գները (դրամ) փետրվար 2010 թ. |
| Կենտրոն | 540000 | 486300 | 485300 |
| Արաբկիր | 432700 | 386000 | 379400 |
| Քանաքեռ Զեյթուն | 332500 | 291100 | 288700 |
| Նորք Մարաշ | 327100 | 285300 | 284500 |
| Ավան | 299500 | 243300 | 238500 |
| Էրեբունի | 305900 | 255700 | 251700 |
| Շենգավիթ | 300000 | 255200 | 251500 |
| Դավթաշեն | 328700 | 280500 | 277500 |
| Աջափնյակ | 294300 | 246500 | 243800 |
| Մալաթիա-Սեբաստիա | 289800 | 244500 | 242300 |
| Նուբարաշեն | 175300 | 147700 | 147500 |
| Միջինը Երեւանում (բացի Նոր Նորքից) | 329600 | 283800 | 281000 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների գները: Այստեղ միջին գները մարտին փետրվարի համեմատ նույնպես աճել են 1 տոկոսով, իսկ ամենաթանկ անհատական տները դարձյալ Ծաղկաձորում ենՙ 1 քմ-ն 307 հազար դրամ: Այս ցուցանիշով Ծաղկաձորը զիջում է միայն Երեւանի Կենտրոն եւ Արաբկիր շրջաններին: Երկրորդը Աբովյանն է 1 քմ-ն 168 հազար դրամ, երրորդը Վաղարշապատն է որտեղ 1 քմ-ն կազմել է 166 հազար դրամ: Ապա գալիս են Աշտարակը 148 հազար դրամ, Գորիսը 144 հազար դրամ, Իջեւանըՙ 142 հազար դրամ, Նոր Հաճընը 135 հազար դրամ, Եղվարդըՙ 128 հազար դրամ 1 քմ դիմաց:
Հողի շուկայում հետեւյալ պատկերն էՙ 2010-ի մարտին 2009-ի մարտի համեմատ, հողերի առուվաճառքի գործարքների քանակն աճել է 28,4 տոկոսով, աճուրդով վաճառքներինը նվազել 12,3 տոկոսով:
2010-ի մարտին 2010-ի փետրվարի համեմատ, անշարժ գույքի վարձակալության գործարքների քանակն աճել է 14 տոկոսով, իսկ 2009-ի մարտի համեմատ նվազել` 10,8 տոկոսով:
Մարտին իրականացվել են հիպոթեկային գրավադրման 161 գործարքներ, որից 118-ը` Երեւանում: Հիպոթեկային գրավադրման գործարքներից 78,3 տոկոսն իրականացվել են բազմաբնակարան բնակելի շենքերի բնակարանների, 15,5 տոկոսը` անհատական բնակելի տների, մնացածը հասարակական նշանակության օբյեկտների, այգետնակների եւ հողերի նկատմամբ: 2010-ի փետրվարի համեմատ, հիպոթեկային գրավադրման գործարքների քանակն աճել է 50,5 տոկոսով, ընդ որում Երեւանում` 49,4 տոկոսով, իսկ մարզերում` 53,6 տոկոսով: 2009-ի մարտի համեմատ, հիպոթեկային գրավադրման գործարքների քանակն աճել է 4,5 անգամ, ընդ որում, Երեւանում` 3,8 անգամ, մարզերում` 8,6 անգամ:
Այսպիսով, 2010-ի մարտին պահպանվել է անշարժ գույքի գների վերջին մի քանի ամսիներին արձանագրվող ամսական փոքր աճը: Այս միտումը, ինչպես նշել էինք նախկինում, հավանաբար, դեռ կշարունակվի առաջիկա ամիսներին: Պահպանվում են նաեւ ընդհանուր գործարքների թվի զգալի աճի տեմպը եւ հիպոթեկային վարկավորման գործարքների նույնպես զգալի աճի միտումը:
ԱՐԱ ՄԱՐՏԻՐՈՍՅԱՆ