Կրթության եւ գիտության նախարարության, Գիտության պետական կոմիտեի եւ ԵրՃՇՊՀ-ի նախաձեռնած «Գիտության զարգացման հիմնահարցերը Հայաստանում» գիտաժողովի հիմնական նպատակն էր անդրադառնալ ոլորտին առնչվող հիմնահարցերին, հեռանկարներին եւ զարգացման ռազմավարությանը:
Գիտաժողովի առաջին օրը նվիրված էր ոլորտում ֆինանսական նոր կարգերի քննարմանը, մշակվող ռազմավարությանը: Իր ելույթում Գիտության պետական կոմիտեի ղեկավար Կարեն Հայրապետյանը նկատեց, որ պահպանելով ֆինանսավորման բազմաձեւությունը` գիտության ոլորտում ֆինանսավորումը պետք է իրականացնել բացառապես մրցույթի կարգով եւ ծրագրային հիմնավորման սկզբունքներով: Նա առաջարկեց իրականացնել բազմաշերտ ֆինանսավորում` գիտակազմակերպչական եւ հիմնարար, կիրառական, հետազոտական ծրագրեր իրականացնող գիտական կազմակերպությունների եւ գիտակրթական ենթակառույցների պահպանման եւ զարգացման նպատակով, պայմանագրային, թեմատիկ ֆինանսավորումը վերածել իրական դրամաշնորհային համակարգի:
Ֆինանսավորման երկրորդ խումբը կոչված է գիտության եւ տեխնիկայի զարգացման գերակա ուղղություններում ապահովելու արդիական խնդիրների լուծում, որոնք կարող են հանգեցնել նոր գիտահետազոտությունների եւ գիտատեխնիկական մշակումների:
Ֆինանսավորման երրորդ խումբը նպատակային-ծրագրային է, որտեղ ընդգրկված թեմաներն առավել կիրառական բնույթ ունեն եւ նպատակաուղղված են պետության առաջադրած խնդիրների լուծմանը:
ՀԱՍՄԻԿ ՀԱՐՈւԹՅՈՒՆՅԱՆ, Ջերմուկ
Հ.Գ.- Գիտաժողովում քննարկվող գործարարական ու ֆինանսական նոր կարգերի վերաբերյալ տեղեկատվություն կներկայացնենք «Ազգ»-ի հաջորդ համարներում: