Հայաստանը թերեւս միակ երկիրն է, որտեղ ֆուտբոլի աշխարհի առաջնության ընթացքում ներքին առաջնությունը շարունակվում է: Առանց այն էլ Հայաստանի առաջնության հանդիպումները տրիբունաներում քիչ թվով հանդիսականներ են հավաքում, իսկ այս օրերին նրանց թիվը հասկանալի պատճառներով ավելի է կրճատվել:
Սակայն Հայաստանի առաջնությունում էլ հետաքրքրական իրադարձություններ են ծավալվում: Այս առումով հատկապես առանձնացավ 11-րդ տուրը: Նախ, տուրն աչքի ընկավ ընթացիկ առաջնության համար ռեկորդային արդյունավետությամբ. խփվեց 19 գնդակ: Իսկ գլխավորը երկրի չեմպիոն «Փյունիկի» անհաջողությունն էր «Ուլիսի» հետ մրցավեճում: Վերջին հանդիպումներում ուլիսցիների խաղը չէր ստացվում: Բացի այդ էլ ընթացիկ մրցաշրջանում «Փյունիկը» 3 անգամ հաղթել էր «Ուլիսին»ՙ սեփական դարպասը պահելով անառիկ: Ուստի ոչ ոք չէր կասկածում, որ «Փյունիկը» հերթական հաղթանակը կտոնի:
Սակայն չեմպիոնի անխափան գործող մեխանիզմում կարծես ինչ որ բան խաթարվեց: Գուցե փյունիկցիների վրա ազդեց արագ բաց թողած գոլը: Արդեն 2-րդ րոպեին Արտակ Գրիգորյանի հարվածից հետո «Փյունիկը» հայտնվեց հետապնդողի դերում: Ճիշտ է, 14-րդ րոպեին Մարկոսը 11 մ հարվածով վերականգնեց հավասարակշռությունը, սակայն դա չեմպիոնի միակ հաջողությունն էր: Ուլիսցիները խաղը կառուցելով հակագրոհների վրա, կարողացան 2-րդ խաղակեսում 2 գոլ խփել ու կարեւոր հաղթանակ տոնել 3-1 հաշվով: Աչքի ընկան Նորայր Սահակյանն ու Դավիթ Գրիգորյանը: Այսպիսով, «Փյունիկն» առաջնությունում անդրանիկ պարտությունը կրեց, ինչը զգալիորեն սրեց մրցակցությունը չեմպիոնի տիտղոսի համար:
«Փյունիկի» «սայթաքումից» օգտվեց «Բանանցը», որը 6-րդ անընդմեջ հաղթանակը տոնելով, միավորներով հավասարվեց առաջատարին: «Բանանցը» վերջին հանդիպումներում բավական ագրեսիվ ու արդյունավետ խաղ է ցուցադրում: «Գանձասարի» հետ խաղում էլ «Բանանցն» արդեն առաջին խաղակեսում վճռեց հանդիպման ելքը: Էդուարդո դո Սանթոսը 2 անգամ գրավեց մրցակցի դարպասը, մեկ անգամ էլ աչքի ընկավ Դենիրան Օրտեգան: Երկրորդ խաղակեսում այլեւս գոլ չգրանցվեց: «Բանանցը» 4-րդ խոշոր հաշվով հաղթանակը տոնեց:
Խոշոր հաշիվ գրանցվեց նաեւ «Միկա»-«Շիրակ» մրցավեճում: Վերջին 4 խաղերում «Միկային» չէր հաջողվում հաղթանակ տոնել: Եվ ահա «Շիրակի» հետ խաղում միկացիները 6 անգամ գրավեցին մրցակցի դարպասըՙ հագեցնելով գոլային ծարավը: 2-ական գոլ խփեցին Էդնեյն ու Էդիլսոնը, մեկական անգամ աչքի ընկան Բոտի Դեմելն ու Արմեն Պետրոսյանը: «Շիրակը» դրանց պատասխանեց Մկրտիչ Նալբանդյանի խփած միակ գնդակով: Նախորդ տուրում «Կիլիկիայի» հետ խաղում հաղթանակը ձեռքից բաց թողնելուց հետո «Միկայի» ղեկավարությունը որոշեց հրաժարվել Աղվամ Մկրտչյանի եւ Ալեքսանդր Թադեւոսյանի ծառայություններից: Աղվանն արդեն նոր թիմ է գտել. նա հանդես կգա Բելառուսի Սոլիգորսկ քաղաքի «Շախտյորում»: Թադեւոսյանի փոխարեն «Միկայի» ավագ է ընտրվել Հրայր Մկոյանը:
Իր երկրպագուներին վերջապես ուրախացրեց «Կիլիկիան», որը 8 խաղ շարունակ հաղթանակ չէր տոնել: Կիլիկիացիները 3-2 հաշվով Դիլիջանում պարտության մատնեցին «Իմպուլսին», որի ղեկը նոր է ստանձնել Արմեն Գյուլբուդաղյանցը: Վերջինիս նորամուտն անհաջող ստացվեց: «Կիլիկիայից» գոլերի հեղինակներ դարձան Տիգրան Ղարաբաղցյանը, Կարեն Խաչատրյանը եւ Սարգիս Մովսիսյանը: «Իմպուլսից» աչքի ընկան Ալբերտ Հովակիմյանը (11 մ հարվածով) եւ Արման Մինասյանը: Այս հաղթանակի շնորհիվ «Կիլիկիան» հեռացավ վտանգավոր գոտուց:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 11 | 8 | 2 | 1 | 28-8 | 26 |
| 2. Բանանց | 11 | 8 | 2 | 1 | 26-11 | 26 |
| 3. Ուլիս | 11 | 7 | 2 | 2 | 16-6 | 23 |
| 4. Միկա | 11 | 6 | 2 | 3 | 19-10 | 20 |
| 5. Իմպուլս | 11 | 3 | 1 | 7 | 8-19 | 10 |
| 6. Կիլիկիա | 11 | 3 | 1 | 7 | 11-23 | 10 |
| 7. Գանձասար | 11 | 3 | 0 | 8 | 8-19 | 9 |
| 8. Շիրակ | 11 | 1 | 0 | 10 | 9-29 | 3 |
Ռմբարկուները
| Էդուարդո դո Սանթոս | «Բանանց» | 10 |
| Գեւորգ Ղազարյան | «Փյունիկ» | 8 |
| Սամվել Մելքոնյան | «Բանանց» | 5 |
| Մարկոս Պիզելի | «Փյունիկ» | 5 |
| Ալբերտ Թադեւոսյան | «Փյունիկ» | 4 |
| Արսեն Ավետիսյան | «Փյունիկ» | 4 |
| Էդնեյ դե Օլիվեյրա | «Միկա» | 4 |
ԱՇՈՏ ՀԱՅՐԱՊԵՏՅԱՆ