Փարիզում մայիսի 30-ին ավարտված Սեն-Ժերմեն-դե-Պրե ջազային փառատոնի օրերին «Լեզ Էդիտոր» (խմբագիրները) կաֆեի դահլիճում ֆրանսահայ երգահան եւ փիլիսոփա Անդեր Մանուկյանը, ով «Սյուպերսթարի» ֆրանսիական տարբերակի ժյուրիի անդամ է, խոսել է ընդհանրապես երաժշտության, կյանքի եւ մասնավորապես ջազի եւ փիլիսոփայության փոխհարաբերության մասին:
Այս մասին տեղեկացնելով «Արմինյն միրոր սփեքթեյթր» շաբաթաթերթի հունիսի 5-ի համարը հավելում է, որ Մանուկյանը դաշնամուր նվագել է սովորել 7 տարեկանից: Համագործակցել է Ջանեթ Ջեքսոնի հետ եւ մասնակցել «Շրեկ-2» ֆիլմի կրկնօրինակման աշխատանքներին:
«Փիլիսոփայությունը գործիք է, միջոցՙ հասկանալու աշխարհը, իրերը, երեւույթները», բացատրել է նա, եւ Ֆրիդրիխ Նիցշեի եւ Ռընե Դեկարտի մասին խորիմաստ եւ հետաքրքրական մանրամասնություններով ու վերլուծականներով գրավել ունկնդիրների ուշադրությունը:
Մանուկյանի վերջին ալբոմը կոչվում է «Այնքան սիրահարված» (So in Love): Նա նաեւ հեղինակ է «Դըլյուզը, Շեյլան եւ ես» գրքի:
Հ. Ծ.