Հայաստանի Հանրապետության կենտրոնական բանկը շրջանառության մեջ է մտցրել 1000 դրամ անվանական արժեքով արծաթե հուշադրամ: «Լվածաղիկ Զանգեզուրի» հուշադրամը թողարկվել է «Ծաղիկների գեղեցկությունը» միջազգային դրամագիտական ծրագրի շրջանակում:
Հուշադրամի դիմերեսի դաշտի ձախում պատկերված է «Լվածաղիկ Զանգեզուրի» ծաղիկը, որի ծաղկաթերթիկների պատկերը անցնում եւ շարունակվում է դարձերեսին: Դիմերեսի դաշտի աջում եզրաշուրթի մոտ պատկերված է երկու ծաղկաթերթիկ, որից ներքեւ եզրաշուրթի մոտ մանր տառատեսակով նշված է թողարկման տարեթիվը` «2010»: Դաշտում ծաղկի եւ ծաղկաթերթիկների միջեւ ոճավորված պատկերներ են: Դաշտի ներքեւի մասում երկու տողով նշված է անվանական արժեքը համապատասխանաբար` «1000» եւ «ԴՐԱՄ»: Եզրաշուրթի շրջագծով վերեւում հայերեն, իսկ ներքեւում անգլերեն մակագրված են համապատասխանաբար` «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» եւ «REPUBLIC OF ARMENIA»:
Հուշադրամի դարձերեսի դաշտում պատկերված են «Լվածաղիկ Զանգեզուրի» ծաղիկը եւ ցողունները: Ծաղկի պատկերից ներքեւ մանր տառատեսակով նշված է հուշադրամի մետաղի եւ հարգի պայմանական գրառումը` «Ag 925»: Եզրաշուրթի շրջագծով վերեւի աջում հայերեն, իսկ ներքեւի ձախում լատիներեն մակագրված է ծաղկի անվանումը համապատասխանաբար` «ԼՎԱԾԱՂԻԿ ԶԱՆԳԵԶՈՒՐԻ» եւ «Tanacetum zangezuricum»:
Հուշադրամը շրջանագծով երկու կողմից ունի ուռուցիկ եզրաշուրթ:
Հուշադրամի պատրաստման ժամանակ օգտագործվել են գունավոր ներկեր:
Ուրվագծերի հեղինակն է Էդուարդ Կուրղինյանը: Հուշադրամը հատվել է «Մայեր» դրամահատարանում (Գերմանիա):
Հուշադրամի բնութագիրը.
| Անվանական արժեքը | 1000 դրամ |
| Մետաղը եւ հարգը | արծաթ, 9250 |
| Զանգվածը | 28,28 գ |
| Տրամագիծը | 38,61 մմ |
| Որակը | պրուֆ |
| Դրամաշուրթը | ատամնավոր |
| Տպաքանակը | մինչեւ 10000 հատ |
ԿԲ հասարակայնության հետ կապերի ծառայություն