Խաչատուր Աբովյանի տուն-թանգարանը վերանորոգումից հետո ներկայանում է 12 բաժիններից բաղկացած նոր ցուցադրությունով. Քանաքեռ, Էջմիածին, Ներսիսյան դպրոցի եւ Դորպատի համալսարանի ուսումնառության տարիներ, 1826-1828թթ. ռուս-պարսկական պատերազմ, Աբովյանը մանկավարժ, Աբովյանը եւ եվրոպական գրականությունը... մինչ` «Անհայտ բացակայությունը»:
Առանձնակի հետաքրքրություն են ներկայացնում Աբովյանի կողմից գրված դասագրքերի եւ ժողովրդական ընթերցանության համար նախատեսված ձեռնարկների բնագրերը, աշխատությունները, որոնք ծառայել են որպես ժողովրդական դպրոցների ուսուցիչներ պատրաստելու ուղեցույցներ: Մեծ հայի կյանքի ու գործունեության այս եւ այլ դրվագներն են ներկայացնում գրողի 200-ամյակին նվիրված ցուցադրության բազմաթիվ վավերագրերն ու լուսանկարները, շուրջ 1500 ցուցանմուշ:
Ցուցադրության բացմանը ներկա էին ՀՀ մշակույթի նախարար Հասմիկ Պողոսյանը, փոխնախարար Արեւ Սամուելյանը, որ հանդես եկավ բացման խոսքով, մտավորականներ, արվեստագետներ, դպրոցականներ:
Խ. Աբովյանի տուն-թանգարանը ստեղծվել է 1938 թ. ապրիլի 25-ին, ՀԽՍՀ ժողովրդական կոմիսարների խորհրդի որոշմամբ, համաձայն որի գրողի Քանաքեռի հայրական տունը վերակառուցվել եւ վերածվել է տուն-թանգարանի: 1939 թ. նոյեմբերին թանգարանը իր դռներն է բացել առաջին այցելուների առջեւ:
1978 թ. կառուցված թանգարանի նոր շենքը թանգարանը հիմնանորոգվել է 2005-ին:
Մ. Մ.