Այսօր ՀՀ կրթության եւ գիտության նախարար Արմեն Աշոտյանը Խ. Աբովյանի անվան պետական մանկավարժական համալսարանի ռեկտորատում պրոֆեսորա-դասախոսական կազմին կներկայացնի բուհի նորանշանակ ռեկտորինՙ Ռուբեն Միրզախանյանին: Վերջինս այդ պաշտոնում փոխարինելու է Արտյուշա Ղուկասյանին, որ հիվանդության եւ երկատարեւ բուժման պատճառով մի քանի շաբաթ առաջ հրաժարական էր տվել պաշտոնից:
Նորանշանակ ռեկտորը հայտնի անուն է մեր հանրապետությունում եւ հատկապես մանկավարժական համալսարանում, որի մշակույթի ֆակուլտետի դեկանն էր 20 տարի: Նույն համալսարանում գիտամանկավարժական գործունեություն է ծավալել դեռեւս 1981 թ.-ից սկսած: Պատմական գիտությունների դոկտոր է: Հեղինակ է 3 գրքերի եւ շուրջ 100 գիտական, գիտամեթոդական եւ հրապարակախոսական գրքերի: Հայաստանի Թեքեյան մշակութային միության վարչության նախագահն է, «Ազգ» օրաթերթի հիմնադիր խորհրդի անդամ: 2009 թ.-ին արժանացել է մշակույթի վաստակավոր գործչի կոչմանը: Նույն թվականին Ամենայն հայոց հայրապետի ձեռամբ ստացել է «Ս. Սահակ-Ս. Մեսրոպ» շքանշանը: Հիմնադիրներից է Հայաստանի Ռամկավար Ազատական կուսակցության, որի ղեկավարն է եղել 1991-1996 եւ 1999-2003 թվականներին: 2003 թ.-ից դադարեցրել է քաղաքական գործունեությունը: Բազմիցս մասնակցել է միջազգային գիտական ու քաղաքական խորհրդաժողովների, արժանացել է բազմաթիվ պարգեւների:
Շնորհավորում եւ հաջողություն ենք մաղթում: