Հարավային Կալիֆոռնիայի համալսարանի (ՀԿՀ) Հայկական ուսումնասիրությունների ինստիտուտը ծրագրում է նոյեմբերի 20-ին համալսարանի տարածքում կազմակերպել Սփյուռքի միավորմանը նվիրված սիմպոզիում, որի ընթացքում ելույթներ կունենան Կալիֆոռնիայի նախկին կառավարիչ Ջորջ Դոքմեջյանը, Հայաստանի Հանրապետությունում նախկին ԱՄՆ դեսպան Ջոն Էվանսը, փաստաբան Մարկ Կիրակոսը, «Կալիֆոռնիա կուրիեր» թերթի հրատարակիչ եւ խմբագիր Հարութ Սասունյանը, լրագրող եւ գրքերի հեղինակ Մարկ Արաքսը, պրոֆ. Հրայր Դոքմեջյանը (ՀԿՀ-ից), պրոֆ. Ստեփան Աստուրյանը (Բարքլեյի Կալիֆոռնիա համալսարանից). դոկտ. Կայծ Մինասյանը (Փարիզի ռազմավարական ուսումնասիրությունների կենտրոնից), Արշալույս Ճգնավորյան-Ասենբաուերը (ՄԱԿ-ի ավագ խորհրդատու Վիեննայից), պրոֆ. Լեւոն Մարաշլյանը (Գլենդեյլի համայնքային քոլեջից) եւ պրոֆ. Էնդրու Դեմիրճյանը (Լոնգ Բիչի Կալիֆոռնիա համալսարանից):
Ըստ այդ առթիվ Ժան Էսքիյանից ստացված հաղորդագրությանՙ զեկուցողները որոնելու են սփյուռքահայ համայնքների միասնական կառույց ստեղծելու հնարավորությունները, որպեսզի կարելի լինի միջազգային հանրությանը մեկ օրինական ձայնով ներկայացնել հայերին հուզող քաղաքական, տնտեսական եւ այլ ոլորտների կարեւոր հարցերը:
Հ. Ծ.