Խորհրդարանում հայտարարել է Թուրքիայի ներքին գործերի նախարարը
Նոյեմբերի 3-ին, թուրքական հեռուստաալիքների վկայությամբ, Թուրքիայի ազգային մեծ ժողովում «Խաղաղություն եւ ժողովրդավարություն» կուսակցության Ստամբուլի պատգամավոր Ուֆուք Ուրասը, որը լայն ճանաչում ունի պոլսահայ շրջանակներում, հետեւյալ հարցումն է արել կառավարությանը. «Ինչո՞ւ չի թույլատրվում վատառողջության պատճառով իր պարտականություններն իրականացնելու կարողությունից զրկված Մեսրոպ Բ Մութաֆյան պատրիարքի փոխարեն նոր պատրիարքի ընտրությունը: Ի՞նչն է պատճառը, որ կառավարությունը անպատասխան է թողնում պատրիարքի ընտրության նախաձեռնող խմբի դիմումը: Մի՞թե երկրի շահերից է բխում Թուրքիայի հայերին առանց պատրիարքի թողնելը»:
Պատգամավոր Ուրասի հարցին պատասխանելիս Թուրքիայի ներքին գործերի նախարար Բեշիր Աթալայը հիշեցրել է 2009-ի դեկտեմբերի 3-ին հայոց պատրիարքարանի Ստամբուլի նահանգապետարան ներկայացրած դիմումը: Նա նշել է, որ այդ դիմումով պատրիարքարանի հոգեւոր խորհուրդը Մութաֆյանին ցմահ պատրիարք է ճանաչել, ելնելով վերջինի առողջական վիճակից, միաժամանակ պահանջել է «աթոռակից» պատրիարքի ընտրություն, նախապես իրազեկելով «աթոռակից պատրիարքի ընտրության նախաձեռնող խմբի» ստեղծման մասին:
Այնուհետեւ նախարար Աթալայը շարունակել է. «Մինչ քննարկվում էր այս պահանջը, 2010-ի հունվարի 14-ին ներկայացվեց նոր պատրիարքի ընտրության անհրաժեշտությունն ընդգծող մեկ այլ դիմում, որտեղ պահանջվում էր նույն թվի մայիսի 12-ին պատրիարքական ընտրությունների նշանակում: Այս դիմումով Ստամբուլի նահանգապետարան էր դիմել պատրիարքարանի նախաձեռնությամբ կազմավորված «աթոռակից պատրիարքի ընտրության նախաձեռնող խումբը», որի դիմումը հակասում է հոգեւոր խորհուրդի դիմումին: Այս հակասության պատճառով, որը պայմանավորված էր ստանձնած պարտականությունը այլ կերպ ընկալելու նախաձեռնող խմբի մոտեցումով, Ստամբուլի նահանգապետարանը անպատասխան թողեց խնդրո առարկա խմբի հունվարի 14-ի դիմումը»:
Վերջում Թուրքիայի ներքին գործերի նախարարն ավելացրել է. «Պատրիարքի պարագայում տեղապահի ինստիտուտը նոր չէ, այլ նախատեսվում է պատրիարքարանի ներքին կանոնադրությամբ: Ոչ ոք չի հրաժարվել նոր պատրիարքի ընտրության գործընթացից: Պատրիարքի տեղապահի նշանակումը անհրաժեշտություն էր եւ կրում է ժամանակավոր բնույթ: Քանի դեռ պատրիարքը ողջ է, նրան կփոխարինի տեղապահը: Եթե նա մահանա, այդ դեպքում արդեն կնշանակվեն նոր պատրիարքի ընտրություններ»:
Հ. Չ.