Ազդարարում են երիտասարդները եւ ցույց տալիս, թե որտեղ պետք է աղբամաններ դնել
Անցած կիրակի օրը Գյումրու կենտրոնի Ռիժկովի (նախկին Կիրովի) ճեմափողոցով անցնողները կարող էին նկատել փողոցի երկայնքով տարբեր տեղեր դրված ստվարաթղթե արկղեր, որոնց վրա նկարված պատկերը հուշում էր, որ դրանք աղբ գցելու համար են: Այս մեկօրյա երիտասարդական բնապահպանական գործողությունը նախաձեռնել էր քաղաքի մի խումբ ակտիվ երիտասարդների վերջերս ստեղծած «Դուք մեր կարիքն ունեք» անվամբ խումբը` նպատակ ունենալով համայնքի ղեկավարությանը հիշեցնել փողոցում աղբամանների բացակայության մասին, իսկ բնակիչներին` որ պետք է քաղաքը մաքուր պահել:
Ժուռնալիստների «Ասպարեզ» ակումբի եւ «Շիրակ կենտրոն» հասարակական կազմակերպության օգնությամբ ու աջակցությամբ ստեղծված այս երիտասարդական խմբի նպատակն է մասնակցել հարազատ քաղաքի զարգացմանը, նպաստել երիտասարդների կարծիքների արտահայտմանը, նրանց ակտիվացմանը, կամավորական, ժամանցային, մարզական եւ մշակութային գործունեության ծավալմանը:
Անցորդները տարբեր կերպ են արձագանքել «Աղբարկղ» գործողությանը. ոմանք անտարբեր են անցել, ոմանք հավանություն են տվել. «Շատ ճիշտ են արել, ինչ լավ բան են մտածել», իսկ որոշ ժամանակ անց մարդիկ իրենց ձեռքում գտնվող աղբը արդեն սկսել են նետել այդ արկղերի մեջ:
Գ. Մ.