Բազմաբնակարան շենքերի կառավարման, շահագործման եւ սպասարկման ռազմավարական ծրագրի հիմնական մոտեցումները ձեւակերպելու եւ հստակեցնելու նպատակով երեկ Երեւանի քաղաքապետարանում կազմակերպվել էր աշխատանքային քննարկում, որին մասնակցում էին համատիրությունների նախագահներ, ոլորտի խնդիրներով զբաղվող ՀԿ-ների եւ կառավարության կողմից ստեղծված միջգերատեսչական հանձնաժողովի ներկայացուցիչներ: Փոխքաղաքապետ Կամո Արեյանը , որը վարում էր քննարկումը, ներկայացրեց Երեւանի քաղաքապետ Կարեն Կարապետյանի մոտեցումը հարցի վերաբերյալ` պետականորեն աջակցել եւ խրախուսել համեմատաբար արդյունավետ աշխատող համատիրություններին, միաժամանակ բարեփոխելով շենքների կառավարման գոյություն ունեցող համակարգը:
Կառավարության հնգամյա ռազմավարական ծրագրով նախատեսվում է շենքերի կառավարման նոր մոդելի ձեւավորում: Օրենքով սահմանված կարգով, յուրաքանչյուր շենքում սեփականատերերի ժողովը կընտրի կառավարիչ, ով կունենա առեւտրային գործունեությամբ զբաղվելու իրավասություն: Վերջինը պարտավոր է հոգ տանել շենքի նորոգման եւ սպասարկման համար, իսկ այդ նպատակով օգտագործվելիք միջոցները կգոյանան ինչպես վարձավճարների հավաքագրումից, այնպես էլ բազմահարկ շենքի ընդհանուր բաժնային սեփականության արդյունավետ բիզնես կառավարումից: Բնակֆոնդի կառավարման նոր մոդելի ներդրումը ենթադրելու է օրենսդրական փոփոխություններ, իսկ ներկայացվող ծրագիրը մշակվել է Համաշխարհային բանկի աջակցությամբՙ հիմնված մեր երկրում կատարված ուսումնասիրությունների եւ Արեւելյան Եվրոպայի երկրների փորձի վրա:
Կամո Արեյանն ընդգծեց, որ թեեւ բնակֆոնդի պահպանումն ու վերանորոգումը բնակարանների սեփականատերերի պարտականությունն է, այնուամենայնիվ առաջարկվող ծրագրով նախատեսվում է նաեւ պետական աջակցություն, որը կլինի նպատակային լրավճարների տեսքով: Ծրագրի իրականացման մեկնարկը կտրվի արդեն այս տարվանից, ընդ որում արդեն իսկ նախատեսված են 2011-2012 թթ. միանվագ պետական ֆինանսավորմամբ շենքերի ենթակառուցվածքների վերականգնման միջոցառումներ: Պետական սուբսիդավորման մեխանիզմը կներդրվի 2014 թ.: Համաձայն ծրագրի, նախատեսվում է ներդնել նաեւ բնակարանային նպաստի ծրագիրը, որը կհատկացվի սոցիալապես անապահով խավերին:
Վերջնական շտկումներից հետո բնակելի ֆոնդի կառավարման ռազմավարական ծրագիրը կներկայացվի կառավարության հաստատմանը: Այս մասին տեղեկացնում է Երեւանի քաղաքապետարանի տեղեկատվության եւ հասարակայնության հետ կապերի վարչությունը:
Մ. Խ.