Արթուր Աբրահամին չհաջողվեց լիովին իրագործել իր ծրագիրը եւ ուժերի լիակատար փորձարկում կատարել Ստեֆան Բոժիչի հետ կայացած 10-ռաունդանոց մենամարտում: Երկրորդ ռաունդում խորվաթ բռնցքամարտիկն Աբրահամին հարվածելիս վնասեց ձեռքը եւ հրաժարվեց մենամարտից: Մրցավարները Աբրահամին տեխնիկական նոկաուտով հաղթանակ գրանցեցին, որը պրոֆեսիոնալ ռինգում անցկացրած 34 մենամարտերում 32-րդն էր:
Սակայն այդ հաղթանակը բնավ էլ չուրախացրեց Արթուրին, քանի որ նա մտադրվել էր Բոժիչի հետ մենամարտում փոխել մարտաոճը, հենց սկզբից ագրեսիվ մարտ վարել, ստուգել իր պատրաստվածության մակարդակը մայիսին Անդրե Ուորդի հետ կայանալիք վճռորոշ մրցամարտից առաջ: Չի բացառվում, որ մինչեւ մայիս Արթուրը եւս մեկ մարզումային մենամարտ անցկացնի: