Երեկ Խ. Աբովյանի անվան Հայկական պետական մանկավարժական համալսարանում (ՀՊՄՀ) փակ քվեարկությամբ ռեկտոր ընտրվեց Ռուբեն Միրզախանյանը, որը մինչ երեկ նույն համալսարանի ռեկտորի պաշտոնակատարն էր: Նիստին խորհրդի անդամներից ներկա էին 27-ը, քվեարկությանը մասնակցեցին նրանցից 26-ը: 5 քվեաթերթիկ ճանաչվեց անվավեր: 20 կողմ ու 1 դեմ ձայներով ընտրվեց Ռուբեն Միրզախանյանը :
Մինչ քվեարկությունը Ռուբեն Միրզախանյանը նշեց. «Ներկայացված բյուջեով ենթադրում ենք` սկսած մարտ ամսից մինչեւ հունիս 40 տոկոսով բարձրացնել դասախոսների աշխատավարձը, կան բյուջետային նման հնարավորություններ»:
Երեկ Մանկավարժական համալսարանի խորհրդի նիստը վարում էր ՀՊՄՀ-ի խորհրդի նախագահը` վարչապետ Տիգրան Սարգսյանը : Նիստի ընթացքում նաեւ հաստատվեցին համալսարանի 2010 թվականի հաշվետվությունը եւ 2011-ի բյուջեն: Այնուհետեւ Տիգրան Սարգսյանն առաջարկեց ստեղծել մի աշխատանքային խումբ, որը կաշխատի բարեփոխումների հայեցակարգի վրա: Խորհրդի նախագահի կարծիքով` այդ փաստաթուղթը դեռ կարիք ունի լրամշակման: Երեկ հաստատվեց հանձնաժողովի կազմը, որը պետք է աշխատի փաստաթղթի վրա, որն էլ այսուհետեւ կունենա նոր անվանում` «Բուհի զարգացման ռազմավարական ծրագիր 2011-2015 թվականների համար»: Նիստի ժամանակ նաեւ ընտրվեց ընթացիկ հարցերով խորհրդի քարտուղար: Հաստատվեց, որ խորհրդի քարտուղարի պարտականությունները կատարելու է Մանուկ Մկրտչյանը:
Այնուհետեւ տեղի ունեցավ փակ քվեարկությունը, արդյունքները հայտնելուց հետո Տիգրան Սարգսյանը շնորհավորեց նորընտիր ռեկտորին եւ շնորհակալություն հայտնեց նախորդ ռեկտոր Արտյուշա Ղուկասյանինՙ տարիների ընթացքում նրա կատարած աշխատանքի համար:
Ի. Պ.