Ֆուտբոլի Հայաստանի ազգային հավաքականի նախկին հարձակվող Ռոբերտ Զեբելյանը նոր մրցաշրջանում հանդես կգա Մինսկի «Դինամոյի» կազմում: 26-ամյա ֆուտբոլիստը 2 տարվա պայմանագիր է կնքել բելառուսական ակումբի հետ: Հաջող հանդես գալու դեպքում նրա պայմանագրի ժամկետը եւս մեկ տարով կարող է երկարաձգվել:
Զեբելյանը նախկինում հանդես է եկել ռուսաստանյան «Ժեմչուժինա», «Կուբան», «Խիմկի» եւ «Բալթիկա» թիմերում: Ի դեպ, ՀՀ հավաքականի գլխավոր մարզիչ Վարդան Մինասյանը պատրաստվում է մեկնել Սոչի, որտեղ ուսումնամարզական հավաք է անցկացնում Մինսկի «Դինամոն» եւ դիտել Զեբելյանի խաղըՙ վերջինիս հավաքական հրավիրելու նպատակով:
Ռոբերտ Զեբելյանը Հայաստանի ազգային հավաքականում 7 խաղ է անցկացրել: Նա նորամուտը նշել է 2006-ի նոյեմբերի 15-ին Հելսինկիում Ֆինլանդիայի հավաքականի հետ կայացած Եվրոպայի առաջնության ընտրական մրցախաղում: Զեբելյանն այդ խաղում հավաքականի մեկնարկային կազմում էր: 78-րդ րոպեին նրան փոխարինեց Արման Քարամյանը: Ազգային հավաքականում առայժմ վերջին հանդիպումը Զեբելյանն անցկացրել է 2008-ի հոկտեմբերի 15-ին Բոսնիայի հավաքականի հետ կայացած աշխարհի առաջնության ընտրական մրցախաղում: