ՀԱՍՄԻԿ ՀԱՐՈՒԹՅՈՒՆՅԱՆ
«Պաշտոնական Բաքուն իրավասու է ոչնչացնել Ստեփանակերտի օդանավակայանում վայրէջք կատարող ինքնաթիռները»: Նման հայտարարությամբ է երեկ հանդես եկել Ադրբեջանի քաղաքացիական ավիացիայի պետական վարչության տնօրեն Արիֆ Մամեդովը : «ԱՊԱ» գործակալության փոխանցմամբ` Մամեդովը հայտարարել է, որ իրենք քայլեր են ձեռնարկում Ստեփանակերտում օդանավակայանի շինարարությունը կասեցնելու ուղղությամբ, եւ անցյալ տարվա հոկտեմբերին այդ կապակցությամբ նախազգուշացում են ուղարկել Քաղաքացիական ավիացիայի միջազգային կազմակերպությանը (ICAO):
«Մենք հայտարարել ենք, որ Ղարաբաղի մեր օդային տարածքը փակ է: «Ավիացիայի մասին» օրենքի համաձայն` նախատեսվում է այդ տարածքում վայրէջք կատարվող ինքնաթիռների ֆիզիկական ոչնչացում», շեշտել է Մամեդովը:
Ադրբեջանի քաղաքացիական ավիացիայի պետական վարչության տնօրենը նաեւ հավելել է, որ քաղաքացիական ավիացիայի միջազգային կազմակերպությունը նամակում կոչ է արել միանալ մի շարք կոնվենցիաների, ջանքեր գործադրել` տարածաշրջանում բացասական երեւույթներից խուսափելու համար: «Համաձայնեցնելով պաշտպանության նախարարության հետ` մենք դարձյալ նամակ ուղարկեցինք` հայտարարելով, որ այդ օդային տարածքը փակ է եւ գտնվում է Ադրբեջանի ռազմաօդային ուժերի վերահսկողության տակ»:
Մամեդովը ասել է, որ ադրբեջանական կողմը խորհուրդ է տվել IACO-ին բացասական երեւույթներից խուսափելու համար այդ մասին տեղեկացնել հակառակորդ կողմին:
Արցախի Հանրապետության նախագահի աշխատակազմի տեղեկատվության գլխավոր վարչության պետ Դավիթ Բաբայանը ` մեկնաբանելով Մամեդովի հայտարարությունները, ասել է, որ ադրբեջանցի պաշտոնյաների հայտարարությունը` Ստեփանակերտի օդանավակայանում վայրէջք կատարող ինքնաթիռների ոչնչացման մասին, վկայում է, որ Ադրբեջանում միջնադարյան մթնոլորտ է տիրում: «Նման հայտարարությունների հեղինակները ոչ միայն անհավասարակշռված մարդիկ են, այլեւ ազգայնամոլ գաղափարախոսության կողմնակիցներ ու կրողներ», ասել է Բաբայանը` հավելելով, որ Ադրբեջանին չի հաջողվի ահաբեկել Ղարաբաղին` ինքնաթիռները ոչնչացնելու սպառնալիքներով: Բաբայանը փաստել է, որ նման սպառնալիքներով Ադրբեջանը փորձում է ահաբեկել արցախցիներին ու վախի մթնոլորտ ստեղծել, որպեսզի ԼՂՀ քաղաքացիները չօգտվեն օդանավակայանից:
«Մենք վճռական ենք Ստեփանակերտի օդանավակայանը գործարկելու հարցում, եւ ոչինչ չի խանգարի դա իրականացնել: Կօգտագործենք Արցախի օդային տարածքը, անկախ նրանիցՙ դա դուր է գալիս Ադրբեջանին, թե ոչ: Իսկ եթե Ադրբեջանը փորձի իրականացնել ասածը եւ փորձի ոչնչացնել ինքնաթիռները, դա անկանխատեսելի հետեւանքներով հղի կլինի հենց Ադրբեջանի համար», ասաց Բաբայանը` հավելելով, որ միջազգային հանրությունը պետք է համարժեք գնահատական տա պաշտոնական Բաքվի նման հայտարարություններին, որոնք բացահայտ քրեական տարրեր են պարունակում:
«Ազգ» -ի հետ զրույցում ԼՂՀ կառավարությանն առընթեր քաղաքացիական ավիացիայի կառավարման վարչության պետ Դմիտրի Ադբաշյանն ասաց, որ Հայաստանն ու Ադրբեջանը Քաղաքացիական ավիացիայի միջազգային կազմակերպության (ICAO) անդամներ են եւ ունեն բազմաթիվ պարտավորություններ: Դրանցից մեկն էլ այն է, որ որեւէ երկիր իրավունք չունի քաղաքացիական ինքնաթիռներ ռմբակոծելու:
«Մինչեւ երեկ կարծում էի, որ Հայաստանի հետ Ադրբեջանն էլ է ICAO անդամ: Սակայն պարզվում է, որ Ադրբեջանը հեռու է քաղաքակիրթ պետություն կոչվելուց եւ նման հեղինակավոր կազմակերպության անդամ լինելով հանդերձ, հանդես է գալիս նման հայտարարություններով: Եթե Ադրբեջանը փորձի նման բան կատարել, ապա նախ եւ առաջ մենք կդիմենք ICAO-ին եւ կպահանջենք Ադրբեջանի հանդեպ սանկցիաներ կիրառել ու նրան զրկել կազմակերպության անդամակցությունից»: Հիշեցնենք, որ Ստեփանակերտի օդանավակայանը կշահագործվի մայիսի 9-ից: Այժմ օդանավակայանում ընթանում են նախապատրաստական վերջին աշխատանքները: Դմիտրի Ադբաշյանը փաստեց, որ Ստեփանակերտի օդանավակայանը հագեցած է լինելու ժամանակակից տեխնիկայով եւ ոչնչով չի զիջելու Բաքվի օդանավակայանին:
ՀԱՍՄԻԿ ՀԱՐՈՒԹՅՈՒՆՅԱՆ
Հ.Գ. Մայիսի 15-ին «Ստեփանակերտի օդանավակայանը կգործի մայիսի 9-ից» հոդվածում հղում անելով ԼՂՀ կառավարությանն առընթեր քաղաքացիական ավիացիայի կառավարման վարչության պետ Դմիտրի Ադբաշյանին, գրել էինք, որ Երեւան-Ստեփանակերտ չվերթերն իրականացնելու է «Արցախէյր» ընկերությունը: ՀՀ կառավարությանն առընթեր քաղաքացիական ավիացիայի գլխավոր վարչության ՔԱԳՎ-ի փոխանցմամբՙ նման ավիաընկերություն ՀՀ-ում գրանցված չէ եւ գործունեություն չի ծավալում, հետեւաբար նշված չվերթի ուղղությամբ թռիչքներ իրականացնելու հարցը ՔԱԳՎ-ում չի քննարկվել:
Մեզ հետ զրույցում Դմիտրի Ադբաշյանը հրաժարվեց որեւէ մեկնաբանություն տալ: