ՀՀ կառավարության որոշմամբ Արաքս գետի ձախակողմյան ափի երկայնքով գետավազի արդյունահանումը թույլատրվում է հանքային արդյունաբերություն իրականացնելու իրավունք ունեցող այն կազմակերպություններին, որոնք կապահովեն ափապաշտպան ինժեներական կառույցների պահպանումը, վերականգնումը եւ նորերի կառուցումը` բացառելով գետի հունի խախտումը: Բնապահպան Կարինե Դանիելյանը «Ազգ» օրաթերթի հետ զրույցում ասաց, որ կառավարության որոշումն ուշացած էր, եւ բնապահպանության նախարարությունը պետք է ավելի շուտ արգելեր գետավազի արդյունահանումը:
«Մեզ հասած տեղեկություններով` տարիներ շարունակ գետի շրջակայքից ավազ են կրել, ինչից գետի հունը փոխվել է: Ավազի հանումը էկոլոգիական եւ օրենսդրական լուրջ խնդիրներ է առաջացնում: Գետի հունը փոխվել է Հայաստանի կողմը: Անգամ, ինձ հասած տեղեկություններով, Թուրքիան Հայաստանին բողոքի նոտա է ուղարկել, թե ինչու են այդպես վարվում սահմանամերձ գետի հետ: Սակայն, իմ կարծիքով, թուրքերը կարող էին բողոքի նոտա չուղարկել, որովհետեւ հայկական կողմի նման պահվածքից Թուրքիայի տարածքը մեծանում է, Հայաստանինը` փոքրանում: Մի քանի տարվա ընթացքում գետի հունը մի քանի հարյուր մետր տեղափոխվել է: Դա կարելի է անվանել ազգային դավաճանություն», ասաց բնապահպանը:
Հ. Հ.