www.ginosi.com-ը բարեգործական ծրագիր է իրականացնումՙ ճապոնական մեծ աղետից տուժած բնակչության օգնություն ցուցաբերելու: www.ginosi.com-ըՙ «Հայկական առցանց ամրագրման կազմակերպությունը» աշխատանքներ է իրացնում միջազգային զբոսաշրջության ոլորտում: Կազմակերպության մամլո հաղորդագրությունը տեղեկացնում է, որ մինչեւ ապրիլի 24-ը կատարվող յուրաքանչյուր ամրագրումից ստացված եկամուտներից նվիրաբերելու է 5 դոլարՙ «Heart to Heart International Japan Disaster Relief» հիմնադրամին:
«Մեր ազգի պատմության ընթացքում մենք տեսել ենք մեր բաժին ցավն ու տառապանքը, եւ այդ օրերին բարի մարդկանց օգնության ձեռք մեկնելու կամքը հաճախ է եղել մեր միակ փարոսն ու հույսը ծանր պահերին: Մենք չափազանց լավ գիտենք, թե ինչ է նշանակում դա եւ պատահական չէ, որ բարեգործության վերջնաժամկետը սահմանվել է ապրիլի 24-ը: Մենք գիտենք, որ, ցավոք սրտի, չենք կարող ժամանակի անիվը հետ պտտել, վերադարձնել անցյալը, վերականգնել հազարավոր մարդկանց խաթարված կյանքերը, բայց մենք հույս ունենք, որ դրամական միջոցները կբարձրացնեն այդ մարդկանց տոկունությունը եւ ազդակ կհանդիսանան փրկվածների համարՙ ապրելու եւ հուսալու», ասել է կազմակերպության հիմնադիր տնօրեն Ջիվան Գինոսյանը:
Մ. Բ.