Ֆուտբոլի Հայաստանի բարձրագույն խմբի ընթացիկ առաջնությունը բավական հետաքրքրական պայքարում է ընթանում: Առաջնության 3-րդ տուրում երկրի չեմպիոն «Փյունիկն» անդրանիկ պարտությունը կրեցՙ 0-1 հաշվով զիջելով «Ուլիսին»: Հետաքրքրական է, որ նախորդ առաջնությունում էլ «Փյունիկին» առաջինը պարտության էր մատնել «Ուլիսը» (3-1), սակայն դա տեղի էր ունեցել 11-րդ տուրում: Իսկ այս տարի չեմպիոնն արդեն 3-րդ տուրում անհաջողության մատնվեց ու զիջեց առաջատարի իր դիրքը:
«Ուլիսի» հետ խաղում «Փյունիկը» կազմի կորուստներ ուներ: Ինչպես հայտնի է, Կառլեն Մկրտչյանը մեկնել է Դոնեցկ ու հանդես է գալու տեղի «Մետալուրգում»: Հիվանդության պատճառով խաղին չմասնակցեց Գեւորգ Ղազարյանը, իսկ թիմի ավագ Սարգիս Հովսեփյանը վնասվածքի պատճառով ընդմիջումից հետո խաղադաշտ դուրս չեկավ: Թեեւ այս ամենին, «Փյունիկն» ավելի մոտ էր հաղթանակինՙ ավելի շատ գոլային պահեր ստեղծելով մրցակցի դարպասին: Սակայն այդ օրը մարզական բախտը կարծես երես էր թեքել փյունիկցիներից: Երեք անգամ Մարկոսի եւ Մանուչարյանի հարվածներից հետո գնդակը դիպավ դարպասաձողին: Խաղային մի քանի դրվագներում էլ հաջող խաղաց «Ուլիսի» դարպասապահ Վլադիմիր Մալկովըՙ հետ մղելով նույն Մարկոսի եւ Մանուչարյանի վտանգավոր հարվածները:
Չեմպիոնի հետ խաղում «Ուլիսը» շեշտը դրել էր հակագրոհների վրաՙ հստակ գործելով պաշտպանությունում: Ընդմիջումից հետո կատարված փոփոխությունների շնորհիվ ուլիսցիները զգալիորեն ակտիվացրին հարձակողական գործողությունները եւ ի վերջո հասան ցանկալի արդյունքի: Խաղավարտից 2 րոպե առաջ «Փյունիկի» դարպասը գեղեցիկ ու դիպուկ հարվածով գրավեց Արտյոմ Ադամյանը: Այս հաղթանակի շնորհիվ «Ուլիսն» իր պատմության մեջ առաջին անգամ գլխավորեց աղյուսակը:
Խաղից հետո կայացած մամուլի ասուլիսում թիմերի մարզիչները հետեւյալ կարծիքն արտահայտեցին:
Վարդան Մինասյան («Փյունիկ»)-Այսօր մեր թիմի ֆուտբոլիստները ցուցադրեցին ընթացիկ մրցաշրջանում իրենց լավագույն խաղը: Գոհ եմ նրանց գործողություններից: Հանդիպումը պետք է ավարտվեր 5-1 հաշվով, սակայն մարզական բախտը կարծես երես էր թեքել մեզանից ու մենք պարտվեցինք:
Սեւադա Արզումանյան («Ուլիս»)-Հաշվի առնելով «Փյունիկի» ֆուտբոլիստների խաղային բարձր որակները, առաջին խաղակեսում հիմնական ուշադրությունը դարձրել էինք պաշտպանությանը: Ընդմիջումից հետո ձգտեցինք հարձակողական ֆուտբոլ ցուցադրել: Թեեւ փյունիկցիները գոլային ավելի շատ պահեր ստեղծեցին, սակայն տղաների նվիրվածության եւ ինչ-որ տեղ էլ մարզական բախտի շնորհիվ չափազանց կարեւոր 3 միավոր վաստակեցինք: Առջեւում «Շիրակի» հետ գավաթի կիսաեզրափակիչ առաջին հանդիպումն է: Ուստի հարկավոր է վերականգնել տղաների ուժերը:
Մեծ հետաքրքրությամբ էր սպասվում նաեւ «Միկայի» եւ «Բանանցի» մրցավեճը: Ընդամենը մի քանի օր առաջ նրանց գավաթային մրցավեճն ավարտվել էր մարտական ոչ-ոքիՙ 3-3: Այս անգամ կրկին գրանցվեց ոչ-ոքի, սակայն դարպասները մնացին անառիկ: Թիմերին չհաջողվեց գոլային շատ պահեր ստեղծել: Մրցակիցներն այս անգամ ուշադիր էին գործում պաշտպանությունում:
Կապանում «Գանձասարի» եւ «Շիրակի» մրցակցության ելքը վճռվեց խաղասկզբում տուգանային հարվածով Արթուր Քոչարյանի խփած միակ գոլի շնորհիվ: Առանց պարտության հանդես եկող «Գանձասարն» անդրանիկ հաղթանակը տոնեց, իսկ «Շիրակն» առաջին անգամ խաղադաշտը թողեց պարտված:
Առաջնության երկու հետնապահներիՙ «Իմպուլսի» եւ «Արարատի» մրցավեճում 2-0 հաշվով հաղթեցին դաշտի տերերը: Թիմի հաղթանակն ապահովեցին Հովհաննես Գոհարյանի եւ Զավեն Բադոյանի խփած գոլերը: «Իմպուլսն» առաջին հաղթանակը տոնելով, հեռացավ վերջին տեղիցՙ հետնապահի դերը զիջելով «Արարատին»:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Ուլիս | 3 | 2 | 1 | 0 | 4-1 | 7 |
| 2. Միկա | 3 | 1 | 2 | 0 | 3-0 | 5 |
| 3. Գանձասար | 3 | 1 | 2 | 0 | 2-1 | 5 |
| 4. Փյունիկ | 3 | 1 | 1 | 1 | 2-2 | 4 |
| 5. Շիրակ | 3 | 1 | 1 | 1 | 2-2 | 4 |
| 6. Իմպուլս | 3 | 1 | 0 | 2 | 3-3 | 3 |
| 7. Բանանց | 3 | 0 | 2 | 1 | 2-4 | 2 |
| 8. Արարատ | 3 | 0 | 1 | 2 | 1-6 | 1 |
Ռմբարկուները
| Արթուր Քոչարյան | «Գանձասար» | 2 |
| Արտյոմ Ադամյան | «Ուլիս» | 2 |