Ֆուտբոլի Հայաստանի բարձրագույն խմբի առաջնության 5-րդ տուրն անցավ դաշտի տերերի բացահայտ առավելությամբ, որոնք հաղթեցին բոլոր չորս խաղերում էլ: Ընդ որում հյուրերին չհաջողվեց գեթ մեկ գնդակ խփել մրցակցի դարպասը:
Առաջնությունում հաղթարշավն է շարունակում «Ուլիսը», որը խոշորՙ 3-0 հաշվով պարտության մատնեց «Արարատին»: Աչքի ընկան Դավիթ Գրիգորյանը, Արտակ Գրիգորյանն ու Գեւորգ Նռանյանը:
Խաղից հետո կայացած մամուլի ասուլիսում թիմերի մարզիչները հետեւյալ կարծիքն արտահայտեցին:
Արկադի Անդրեասյան («Արարատ») - Արարատցիները մշտապես սխալներ են թույլ տալիս, չեն պահպանում խաղային կարգապահությունը: Նրանցից ոմանք դեռեւս բարձրագույն խմբում խաղալու փորձ չունեն: Այսօր դարպասապահն էլ սխալներով խաղաց, թիմակիցներին ճիշտ չէր հուշում: Ուստի 2-րդ գոլից հետո նա փոխարինվեց: Մենք փորձառու ֆուտբոլիստներին խաղալու հնարավորություն ենք տվել, սակայն նրանք չեն արդարացնում սպասելիքները: Ավելի ճիշտ կլինի նրանց փոխարեն խաղան երիտասարդները: Մենք պետք է ազատվենք նման ֆուտբոլիստներից, այդ թվում հավանաբար նաեւ դարպասապահ Ալեքսանդր Պետուխովից:
Սեւադա Արզումանյան («Ուլիս») - Մինչեւ առաջին գոլը մեզ համար շատ դժվար էր խաղալը: Սակայն մրցակցի պաշտպանների սխալից հետո կարողացանք բացել հաշիվը: Ընդմիջումից հետո խփած արագ գոլը վստահություն ներշնչեց մեր տղաներին: 2-րդ խաղակեսում մեր պաշտպանների գործողություններում թերություններ նկատվեցին: Այժմ մեզ համար կարեւորը մինչեւ հաջորդ խաղը ֆուտբոլիստների վերականգնումն է:
Աստիճանաբար մրցաշարային գործերն է բարելավում «Փյունիկը», որը սեփական հարկի տակ 1-0 հաշվով հաղթեց «Շիրակին»: Հանդիպման ելքը վճռեց 17-րդ րոպեին Էդգար Մանուչարյանի խփած միակ գնդակը: 2-րդ խաղակեսում շիրակցի Անդրանիկ Բարիկյանին հաջողվեց գրավել մրցակցի դարպասը, սակայն մրցավարը «խաղից դուրս» վիճակ արձանագրեց: Այս առնչությամբ «Շիրակի» մարզիչ Ֆելիքս Խոջոյանը նշեց, որ հարկավոր է դիտել այդ դրվագի տեսագրությունը:
«Շիրակի» հետ խաղում «Փյունիկի» դարպասը պաշտպանում էր երիտասարդ Կարեն Իսրայելյանը: «Փյունիկի» գլխավոր մարզիչ Վարդան Մինասյանը տեղեկացրեց, որ սերբ դարպասապահ Դորդե Պանտիչի հարցում սխալվել են, ուստի նրա հետ պայմանագիրը լուծարվեց: Ներկայումս «Փյունիկը» դարպասապահի կարիք ունի: Տրանսֆերային պատուհանի բացման ժամանակ «Փյունիկը» կձգտի նոր դարպասապահ հրավիրել:
Ընթացիկ առաջնությունում հաջող են հանդես գալիս «Գանձասարի» ֆուտբոլիստները, որոնք առայժմ անպարտելի են: «Գանձասարը» Կապանում 1-0 հաշվով հաղթեց «Միկային»: Խաղասկզբում Գեւորգ Կասպարովի պաշտպանած դարպասը գրավեց Վիրգին Մարշավելան: «Գանձասարը» 3-րդ անընդմեջ հաղթանակը տոնեց:
Անհաջող ելույթներն է շարունակում «Բանանցը», որին ոչ մի կերպ չի հաջողվում անդրանիկ հաղթանակը տոնել: Իջեւանում էլ «Բանանցը» 0-1 հաշվով պարտվեց «Իմպուլսին», որին հաղթանակ պարգեւեց Արթուր Պետրոսյանի խփած միակ գնդակը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Ուլիս | 5 | 4 | 1 | 0 | 10-2 | 13 |
| 2. Գանձասար | 5 | 3 | 2 | 0 | 4-1 | 11 |
| 3. Փյունիկ | 5 | 3 | 1 | 1 | 7-5 | 10 |
| 4. Միկա | 5 | 2 | 2 | 1 | 6-3 | 8 |
| 5. Իմպուլս | 5 | 2 | 0 | 3 | 6-6 | 6 |
| 6. Շիրակ | 5 | 1 | 1 | 3 | 3-6 | 4 |
| 7. Բանանց | 5 | 0 | 2 | 3 | 5-9 | 2 |
| 8. Արարատ | 5 | 0 | 1 | 4 | 1-10 | 1 |
Ռմբարկուները
| Գեորգի Կրասովսկի | «Ուլիս» | 3 |
| Գեւորգ Ղազարյան | «Փյունիկ» | 2 |
| Արթուր Քոչարյան | «Գանձասար» | 2 |
| Նարեկ Բեգլարյան | «Միկա» | 2 |
| Արտյոմ Ադամյան | «Ուլիս» | 2 |
| Բրունո Կորեա | «Բանանց» | 2 |
| Զավեն Բադոյան | «Իմպուլս» | 2 |