Ֆուտբոլի Հայաստանի ազգային եւ երիտասարդական հավաքականները երեկ երկօրյա ուսումնամարզական հավաք են սկսել Ավանի ֆուտբոլի ակադեմիայում: Ազգային հավաքականը նախապատրաստվում է հունիսի 4-ին Սանկտ Պետերբուրգում Ռուսաստանի ընտրանու հետ կայանալիք ընտրական մրցախաղին, իսկ երիտասարդականը հունիսի 7-ին Չեռնոգորիայի հավաքականի հետ հանդիպումով մեկնարկելու է Եվրոպայի երիտասարդական առաջնության ընտրական մրցաշարում:
Այս հավաքին ազգային եւ երիտասարդական հավաքականների գլխավոր մարզիչներ Վարդան Մինասյանն ու Ռաֆայել Նազարյանը հրավիրել են միայն Հայաստանում հանդես եկող ֆուտբոլիստների: Ազգային հավաքականի կազմում հավաքին մասնակցում են «Փյունիկից», «Միկայից», «Ուլիսից», «Բանանցից» եւ «Իմպուլսից» հրավիրված 13 ֆուտբոլիստներ: Երիտասարդական հավաքական են հրավիրվել «Փյունիկի», «Բանանցի», «Գանձասարի», «Միկայի» եւ «Արարատի» 23 ֆուտբոլիստներ: Հավաքը կավարտվի այսօր ժամը 18-ին կայանալիք ազգային եւ երիտասարդական հավաքականների հանդիպումով: