Կիրիշիում ավարտին է մոտենում «Աշխարհի երիտասարդ աստղեր» շախմատի միջազգային 9-րդ մրցաշարը: Ավարտական երկու տուրերից առաջ ՖԻԴԵ-ի վարպետ Կարեն Գրիգորյանը 6,5 միավորով ռուսաստանցի Յուրի Ելիսեեւի հետ գլխավորում է աղյուսակը:
Կարենն անհաջող սկսեց մրցաշարըՙ մեկնարկում պարտվելով ռուսաստանցի Կիրիլ Ալեքսեենկոյին: Դա նրա առաջին եւ առայժմ միակ պարտությունն է: Դրանից հետո 16-ամյա հայ շախմատիստը բռնեց վերելքի ուղին: Վերջին 4 տուրերում նա վաստակեց 3 միավոր: Կարենը հաղթեց ռուսաստանցի Վասիլի Ուսմանովին ու ադրբեջանցի Զաուր Մամադովին, հաշտություն կնքեց ադրբեջանցի Ուլվի Բաջարանիի եւ Անդրեյ Ստուկոպինի հետ:
Վերջին 2 տուրերում Գրիգորյանը մրցելու է թուրքմեն Յուսուպ Աթաբաեւի եւ իր գլխավոր հակառակորդ, ռուսաստանցի Յուրի Ելիսեեւի հետ: Հենց վերջինիս հետ մրցավեճն էլ վճռորոշ կլինի առաջին տեղի համար մղվող պայքարում: Առաջատարներին մեկական միավոր են զիջում Յուսուպ Աթաբաեւը, Կիրիլ Ալեքսեենկոն, Մակսատ Աթաբաեւն ու Ուլվի Բաջարանին: