Երեկ նոր ուսումնական տարին սկսվեց նաեւ Սանկտ Պետերբուրգի թիվ 259 հայերեն բաղադրիչով միջնակարգ դպրոցի աշակերտների համար։
2006 թ. Պետերբուրգի կրթության կոմիտեն, ընդառաջելով Նոր Նախիջեւանի եւ Ռուսաստանի հայոց թեմի առաջնորդ Եզրաս եպս. Ներսիսյանի խնդրանքինՙ վերաբացելու խորհրդային կարգերի հաստատման հետեւանքով փակված երեք հայկական դպրոցներից մեկը, եկեղեցու շուրջը համախմբված հայ համայնքին հնարավորություն է տալիս քաղաքի թիվ 259 միջնակարգ դպրոցում ուսուցանել հայոց լեզուն, պատմությունն ու մշակույթը։ Դպրոցը մշտապես գտնվում է քաղաքային իշխանությունների եւ հայ համայնքի հոգածության ներքո։
Նոր ուսումնական տարվա բացման հանդիսությանը ներկա համայնքի հոգեւոր սպասավոր Խադ քհն. Ղազարյանը դպրոցի հյուրերին, աշակերտներին եւ ծնողներին փոխանցեց առաջնորդ սրբազան հորՙ Եզրաս եպիսկոպոսի օրհնությունն ու շնորհավորական խոսքը նոր ուսումնական տարին սկսելու եւ «Գիտելիքի օրվա» առթիվ։
Աննկարագրելի բերկրանքով էին առաջին անգամ դպրոց եկել թվով 22 երեխաներ։ Պետք էր տեսնել, թե ինչպես բոլոր աշակերտների սրտերը լցված էին ուրախությամբ, նոր հույսերով, ուսումնական տարին գիտելիքներ ձեռք բերելու ձգտումով։
Եկող կիրակի նոր ուսումնական տարին կմեկնարկի նաեւ Սանկտ Պետերբուրգի Հայ առաքելական եկեղեցուն կից Լազարյանների անվան հայեցի դաստիարակության կենտրոնի սաների համար։
Սանկտ Պետերբուրգի Հայ առաքելական եկեղեցու լրատվական կենտրոն