Ալիկ Սարգսյանը հրաժարական տվեց
Կարեն Կարապետյանի հրաժարականից հետո քաղաքապետի պաշտոնակատար Տարոն Մարգարյանի թեկնածությունը պաշտոնապես հաստատվեց ՀՀԿ խորհրդի եւ այնուհետեւ գործադիր վարչության երեկվա նիստում, որը մինչեւ ուշ գիշեր շարունակվում էր ՀՀԿ կենտրոնական գրասենյակում: Ըստ ՀՀԿ մամլո խոսնակ Էդուարդ Շարմազանովի, Տ. Մարգարյանի թեկնածությունը առաջարկել է անձամբ ՀՀ նախագահը եւ ընդունվել է ցնծությամբ:
Երեկվա երեկոն ընդհանրապես հարուստ էր քաղաքական իրադարձություններով: Քաղաքապետի թեկնածության հարցից բացի արագորեն տարածվեց նաեւ ՀՀ ոստիկանապետ Ալիկ Սարգսյանի հրաժարականի լուրը, որը երկրորդվեց կիսապաշտոնական շրջանակների տեղեկատվությամբ, թե փոխոստիկանապետ Վովա Գասպարյանը փոխարինելու է նրան նույն պաշտոնում: Առայժմ հայտնի չէ ոստիկանապետի հրաժարականի պատճառը: