Երեկ Նիոնում կայացավ 2012-2013-ի Եվրոպայի պատանեկան առաջնության մինչեւ 17 եւ մինչեւ 19 տարեկանների ընտրական մրցաշարի որակավորման առաջին փուլի, ինչպես նաեւ մինչեւ 19 տարեկանների Եվրոպայի ընթացիկ առաջնության էլիտար փուլի մասնակիցների վիճակահանությունը:
Ինչպես հայտնի է, Հայաստանի մինչեւ 19 տարեկանների պատանեկան հավաքականը Եվրոպայի առաջնության ընտրական մրցաշարի որակավորման փուլում, որի հանդիպումներն անցկացվեցին Երեւանում, հաջող էր հանդես եկել ու հաջորդ փուլի ուղեգիր էր նվաճել: Եվ ահա վիճակահանությամբ Վարազդատ Ավետիսյանի սաներին բավականին ուժեղ մրցակիցներ են բաժին հասել: Մեր հավաքականն ընդգրկվել է ընտրական 7-րդ խմբում, որտեղ հանդես են գալու նաեւ Եվրոպայի մինչեւ 19 տարեկանների գործող չեմպիոն Իսպանիայի, Բելգիայի եւ Իտալիայի ֆուտբոլիստները: Այս խմբի մրցաշարը կանցկացվի 2012-ի մայիսի 25-28-ը, Իտալիայում:
2012-2013-ի Եվրոպայի առաջնության ընտրական մրցաշարի որակավորման 1-ին փուլում մինչեւ 19 տարեկանների հավաքականն ընդգրկվել է 9-րդ խմբում, որտեղ մրցելու է Շոտլանդիայի, Շվեյցարիայի եւ Ռումինիայի ընտրանիների հետ: Այս խմբի մրցաշարը կանցկացվի Շոտլանդիայում 2012-ի հոկտեմբերի 9-14-ը:
Մինչեւ 17 տարեկանների հավաքականը հանդես կգա ընտրական 1-ին խմբում: Մրցակիցները կլինեն Բելառուսի, Սերբիայի եւ Մոլդովայի ֆուտբոլիստները: Խաղերը կկայանան 2012-ի սեպտեմբերի 25-30-ը Սերբիայում:
Նշենք, որ որակավորման փուլում յուրաքանչյուր խմբում 1-2-րդ տեղերը զբաղեցրած հավաքականները, ինչպես նաեւ 3-րդ տեղը զբաղեցրածների մեջ լավագույն արդյունքի հասած 2 ընտրանիները կշարունակեն պայքարը: