Դեկտեմբերի 3-ին ժամը 10:00-ից Թումո կենտրոնում (Հալաբյան 16) տեղի կունենա Հայաստանում տեղեկատվական տեխնոլոգիաների զարգացմանը նվիրված ArmNet կոնֆերանսը:
Կոնֆերանսն անց է կացվում ArmNet 2011 միջոցառումների շրջանակում արդեն երկրորդ անգամ եւ այս տարի կրում է «Նորագույն միտումներ. շարժական ինտերնետ, ամպային տեխնոլոգիաներ» խորագիրը:
ArmNet կոնֆերանսի շրջանակներում այս տարի ելույթ կունենան ՏՏ ոլորտի այնպիսի միջազգային մասնագետներ, ինչպիսիք են Google-ի ռուսաստանյան մասնաճյուղի ավագ վերլուծաբան Ստանիսլավ Վիդյաեւը, Twitter-ի ծրագրային հավելումների զարգացման գլխավոր մենեջեր Րաֆֆի Կրիկորյանը, Ֆրանս Տելեկոմի NexT ապրանքների գծով ռազմավարական մարքեթինգի ղեկավար Իգոր Դուպլիցկին եւ այլք:
Կոնֆերանսին մասնակցությունն անվճար է, սակայն մուտք գործելու համար պետք է նախապես գրանցվել: Գրանցվել եւ կոնֆերանսի օրակարգին ծանոթանալ կարելի է http://www.armnetawards.am/ պաշտոնական կայքի համապատասխան բաժնում:
Կոնֆերանսի ամբողջ ընթացքում կգործի մամլո կենտրոն, որտեղ ԶԼՄ-ների ներկայացուցիչներին հնարավորություն կտրվի իրենց հարցերն ուղղել կոնֆերանսի մասնակիցներին:
Դեկտեմբերի 3-ի երեկոյան ժամը 20:00-ին Գաֆեսճյան արվեստի կենտրոնի համերգային դահլիճում (Կասկադ) տեղի կունենա Armnet Awards 2011 պաշտոնական մրցանակաբաշխությունը, որի ժամանակ կամփոփվեն վեբ-կայքերի ArmNet համահայկական վեբ-մրցույթի արդյունքները եւ կներկայացվեն հաղթողների անունները:
Մրցանակներ կտրվեն 8 լավագույն կայքերին հետեւյալ անվանակարգերում`
Դիզայն եւ հարմարավետություն
Նորարարություն
Տեխնիկական կատարում
Բովանդակություն
Տարվա առաջընթաց
Գլխավոր մրցանակ
Ժողովրդական ընտրություն
Orange-ի սահմանած մրցանակ` լավագույն մոբայլ կայքի համար
ArmNet 2011 ամենամյա միջոցառումների շարքի կազմակերպիչներն են SP Marketing Solutions, Orange Armenia եւ Հայաստանի ինտերնետ հանրություն ՀԿ կազմակերպությունները:
«Armnet 2011»-ը կոչված է գնահատել տեխնոլոգիաների հանրայնացման հետ մեկտեղ` ինտերնետի հայկական սեգմենտում կատարված առաջընթացը, խրախուսել հայկական կայքերի բովանդակային զարգացումը եւ նպաստել նոր ընկերությունների ստեղծմանը:
Ավելի մանրամասն մրցույթի, կոնֆերանսի եւ Startup weekend-ի ընթացակարգին ծանոթանալու, ինչպես նաեւ մասնակցությունը հաստատելու համար այցելեք «Armnet 2011»-ի պաշտոնական կայք` http://www.armnetawards.am/