36-ամյա Վախթանգ Դարչինյանը եւս մեկ հնարավորություն կունենա քաշային 3-րդ կարգում էլ աշխարհի չեմպիոնի տիտղոսը նվաճելու: Ինչպես տեղեկացրել է Վախթանգի պրոմոութեր Գերի Շոուն, համաձայնություն է ձեռք բերվել ճապոնացի պրոմոութեր Ակիխիկո Հոնդայի հետ թեթեւագույն քաշային կարգում WBC-ի վարկածով աշխարհի ներկայիս չեմպիոն Շինսուկե Յամանակայի հետ մենամարտ կազմակերպելու հարցում: Նախատեսվում է այդ մենամարտն անցկացնել մարտի վերջին կամ ապրիլի սկզբին:
«Շատ ուրախ եմ, որ կարողացա Վիկի համար չեմպիոնական մենամարտ կազմակերպել: Նա շատ էր ցանկանում եւս մեկ հնարավորություն ստանալ պայքարելու աշխարհի չեմպիոնի տիտղոսի համար: Դա է պատճառը, որ թեեւ չնչին պարգեւավճարին, համաձայնվեցինք ճապոնացի բռնցքամարտիկի հետ մենամարտելու առաջարկին: Դեռեւս Յամանակիի մենամարտերի տեսագրությունները չեմ դիտել: Դրանց դիտումից հետո պատկերացում կկազմեմ մրցակցի մասին: Պետք է արժանին մատուցել Վիկին, որը մշտապես ցանկանում է ուժեղ բռնցքամարտիկների հետ մենամարտել եւ պատրաստ է ռինգ դուրս գալ յուրաքանչյուր երկրում», նշել է Գերի Շոուն:
29-ամյա Յամանական առայժմ պրոֆեսիոնալ ռինգում պարտություն չունի: Նա անցկացրած 17 մենամարտերից 15-ում հաղթել է, 2-ն ավարտել է ոչ-ոքի: WBC-ի վարկածով աշխարհի չեմպիոնի թափուր տիտղոսին նա արժանացել է իր նախորդ մենամարտումՙ տեխնիկական նոկաուտով 11-րդ ռաունդում հաղթելով մեքսիկացի Քրիստիան Էսկիվելյային: Վախթանգ Դարչինյանը պրոֆեսիոնալ ռինգում 42 մենամարտերից 37-ում հաղթել է, 1-ն ավարտել է ոչ-ոքի, կրել է 4 պարտություն: Վերջին մենամարտը նա անցկացրել է անցյալ տարվա դեկտեմբերի 3-ին ԱՄՆ-ի Անահայմ քաղաքում, որտեղ միավորներով զիջել է Անսելմո Մորենոյին: