Կորեայի Հանրապետության նախագահ Լի Պեն Բակը պաշտոնական այցով Թուրքիայում կլինի փետրվարի 4-7-ը: Ուղեւորության շրջանակներում քննության կառնվի ատոմային էլեկտրակայանի շինարարության ոլորտի համագործակցությանը վերաբերող համաձայնագիրը: Այդ մասին հաղորդում է newsru.co.il կայքէջը:
«Հյուրիեթ» թերթի տեղեկացմամբ, Թուրքիան արդեն ծրագրել է երկու ատոմակայանի շինարարություն: Առաջինը կառուցելու են ռուսաստանցի մասնագետները: Ավելի վաղ Անկարան Սեուլի հետ պայմանավորվել էր եւս մեկ ԱԷԿ-ի կառուցման առնչությամբ, սակայն կողմերը լիակատար համաձայնության չէին հասել: Այդ պատճառով Թուրքիայի կառավարությունը դիմել էր Ճապոնիային, բայց «Ֆուկուշիմա-1»-ի վթարից հետո Անկարան վերսկսել էր բանակցությունները Սեուլի հետ:
Հավանական է, որ ԱԷԿ-ի կառուցման պայմանագիրը ստորագրվի Լի Պեն Բակի առաջիկա այցի օրերին:
Միջուկային ոլորտից բացի, Թուրքիան Կորեայի հետ համագործակցում է ռազմական ոլորտում, մասնավորապես թուրքական «Ալթայ» տանկի ստեղծման, հաուբիցի մշակման եւ թուրք օդաչուների պատրաստման նախագծերում:
Թուրքիայում ԱԷԿ-ի կառուցումը հետաքրքրում է նաեւ չինացի եւ իրանցի մասնագետներին: