Ստեփանակերտի քաղաքապետ Սուրեն Գրիգորյանը համամիտ չէ այն տարեթվին, որով պաշտոնապես նշվում է ԼՂՀ մայրաքաղաքի տարիքը: Նրա խոսքով, 1923 թվականին քաղաքն ընդամենը վերանվանվել է Ստեփան Շահումյանի անունով, իսկ մինչ այդ, սկսած Վաչագան Բարեպաշտ թագավորի ժամանակներից, բնակավայրը կոչվում էր Վարարակն: Այս տեսակետը նա հայտնել է իր պաշտոնավարման հարյուր օրվա կապակցությամբ հրավիրած ասուլիսի ժամանակ: Ծրագրված է առաջիկայում ստեղծել քաղաքի պատմության թանգարան, եւ այդ շրջանակում քաղաքապետն ակնկալում է պատմաբանների գիտականորեն հիմնավորված եզրակացությունը` Ստեփանակերտի տարիքը ճիշտ նշելու համար:
Միեւնույն ժամանակ, Սուրեն Գրիգորյանը վերապահում ունի Ստեփանակերտ ժամանողների այն կարծիքին, թե քաղաքը շատ մաքուր է: Մայրաքաղաքում շուրջօրյա ջրամատակարարման նպատակով նոր ջրագծեր են անցկացվել, սակայն խողովակների տեղադրումից հետո քանդված հատվածները չեն ասֆալտապատվել, մի շարք փողոցներ դարձել են ցեխոտ ու դժվարանցանելի: Այս տարվա բյուջեով համապատասխան գումարներ են նախատեսվել փողոցներն ու շենքերի բակերը հնարավորինս կարգի բերելու համար, նշեց քաղաքապետը:
Բնակչությունից արդարացի բողոքներ են հնչում նաեւ ջրամատակարարման հետ կապված: Ս. Գրիգորյանը դա բացատրեց այն հանգամանքով, որ ջրագծեր անցկացնող ընկերությունը պատրաստի հատվածները դեռ չի հանձնել «Ջրմուղ-կոյուղի» ընկերության տնօրինմանը: Շուրջօրյա ջրամատակարարման նախագծային արժեքը կազմում է 9 միլիարդ դրամ, որի շուրջ 65 տոկոսը, թեպետ ոչ պատշաճ որակով, արդեն իսկ կատարված է: Այդ առնչությամբ նա լրագրողներին տեղեկացրեց, որ խնդիրը շահագրգիռ կառույցների մասնակցությամբ քննարկվել է ԼՂՀ նախագահի մոտ: Հանրապետության ղեկավարը քաղաքաշինության նախարարին հանձնարարել է մանրամասն ուսումնասիրել վիճակը, իսկ թերացումների մասին հավաքված նյութերն ըստ քաղաքապետի` կհանձնվեն դատախազություն:
Սուրեն Գրիգորյանը անդրադարձավ նաեւ բազմահարկ շենքերի տանիքների անմխիթար վիճակին, նշելով, որ դրանք եւս քաղաքապետարանի ուշադրության կենտրոնում են: Հաշվառված են այն բոլոր շենքերը, որոնց տանիքներն առաջնահերթ վերանորոգման կարիք ունեն, եւ ընթացիկ տարում դրանք կթիթեղապատվեն, հավաստիացրեց քաղաքապետը:
Իր նախընտրական ծրագրում Ս. Գրիգորյանը խոստացել էր քաղաքացիներից ստացված բոլոր բողոքներին լիաժեք ընթացք տալ: Այդ նպատակով քաղաքապետարանում ստեղծվել է նոր բաժին, որն զբաղվում է քաղաքացիների դիմում-բողոքների ուսումնասիրությամբ:
Իսկ ընդհանրապես, նոր քաղաքապետի գործելաոճը թափանցիկությունն ու հրապարակայնությունն է: Ս. Գրիգորյանի անմիջական նախաձեռնությամբ ստեղծվել է քաղաքապետարանի պաշտոնական կայքէջ (www.stepanakert.am), որի շնորհանդեսը տեղի ունեցավ մամուլի ասուլիսի վերջում: Քաղաքապետի նորանշանակ մամուլի քարտուղար Դավիթ Միքայելյանը , ներկայացնելով կայքէջը, համոզմունք հայտնեց, որ լրատվամիջոցների ներկայացուցիչների հետ հետագա համագործակցությունը կլինի արդյունավետ:
ԿԻՄ ԳԱԲՐԻԵԼՅԱՆ, Ստեփանակերտ