Շախմատի Վեյք Ան Զեեի մրցաշարի ավարտից հետո Լեւոն Արոնյանը հարցազրույց է տվել Chess-news.ru կայքի լրագրող Եվգենի Սուրովին, որը որոշ կրճատումներով ներկայացնում ենք «Ազգի» ընթերցողներին:
- Լեւոն, ինչպիսի՞ն են տպավորություններդ գլխավոր մրցանակը ստանալուց հետո, երբ հայրենակիցներդ դահլիճում պարզեցին Հայաստանի դրոշը:
- Շատ գոհ եմ, որ հաջողվեց շատ լավ խաղ ցուցադրել: Իրոք արդյունքը տպավորիչ է: Շատ ուրախ եմ, որ իմ խաղով բավականություն պատճառեցի դահլիճում հավաքվածներին ու իմ երկրպագուներին:
- Պարգեւատրումից հետո նշեցիր, որ սա քո կարիերայի ամենահաջողված մրցաշարն էր: Իրո՞ք դա այդպես է:
- Ինձ թվում էՙ այո: Իհարկե, շատ մրցաշարերում եմ հաղթել, սակայն միշտ չէ, որ հաջողվել է վերահսկել խաղի ընթացքը: Իսկ այստեղ, ըստ իս, պարտիաների մեծամասնությունում իրադրությունն իմ վերահսկողության տակ էր:
- Նաեւ հայտարարել էիր, որ այսօր առավոտյան ժամը 6-ին ես արթնացել: Ինչո՞վ էր դա պայմանավորված: Վճռորոշ պարտիայից առաջ հուզվու՞ւմ էիր:
- Այո, հուզվում էի: Համոզված չէիՙ խաղալ հաղթանակի համար, թե՞ ոչ: Ի վերջո պրագմատիզմը հաղթեց եւ որոշեցի խաղալ հանգիստ ու հուսալի: Ինչպես պարզվեց, մրցակիցս եւս դեմ չէր ոչ-ոքի արդյունքին, ինչն էլ ինձ թույլ տվեց դառնալ մրցաշարի հաղթող:
- Իսկ ահա Ռաջաբովը նշել էր, որ հոգու խորքում հույս ուներ, որ դու կխաղաս հաղթանակի համար, որպեսզի վարկանիշդ ավելի ավելացնես:
- Վարկանիշն ինձ համար այդքան մեծ նշանակություն չունի:
- Ասուլիսի ժամանակ նաեւ նշել էիր, որ այդ հաջողությունն ինչ-որ չափով անակնկալ էր քո համար, քանի որ չէիր հասցրել որոշ թերություններ շտկել:
- Անցած տարվա վերջում շատ մրցաշարերի եմ մասնակցել: Ստիպված էի կիրառել նորույթներիս մեծ մասը: Դրանցից հետո որոշեցի հանգստանալ, մեկ ամիս շախմատով ընդհանրապես չեմ զբաղվել: Ինձ թվում էր, որ դա կարող է վտանգավոր լինել, քանի որ այդ ընթացքում մրցակիցներն աշխատում էին: Բայց ինչպես պարզվեց, թարմ ուղեղն էլ ինչ-որ բան արժե: Բախտս բերեց, որ մրցակիցներիցս ոմանք իմ հին պատրաստությունների վրա բռնվեցին: Դա նման է նրան, որ թակարդ ես դնում ու սպասում ես:
- Եվ շա՞տ ունեք այդպիսի թակարդներ:
- Դրանք շատ քիչ են: Այս ուղղությամբ հարկավոր է աշխատել:
- Հաջորդ մրցաշարը ո՞րն է լինելու քեզ համար:
- Առայժմ այդ մասին չեմ մտածել: Միայն Կրամնիկի հետ մրցախաղն է:
- Այսօր տեղեկություն ստացվեց, որ հավանաբար ապրիլի վերջին կայանա Լինարեսի մրցաշարը: Փաստորեն, դու չես մասնակցելու մրցաշարին:
- Մենք լուրջ մարդիկ ենք եւ եթե Կրամնիկի հետ պայմանագիր ենք ստորագրել մրցախաղի անցկացման վերաբերյալ, ապա Լինարեսից պետք է հրաժարվել:
- Իսկ ե՞րբ իմացար, որ Կրամնիկը ցանկանում է մրցել քեզ հետ:
- Կրամնիկն ինձ էլեկտրոնային փոստով հարցում էր կատարել, թե կցանկանա՞մ խաղալ իր հետ: Իհարկե, ցանկությունս մեծ է: Ի տարբերություն Կրամնիկի, նման մրցախաղերի մեծ փորձ չունեմ, ուստի այն ինձ համար օգտակար կլինի:
- Դո՞ւ էլ Կրամնիկի պես այդ մրցախաղը դիտում ես որպես հավակնորդների մրցամարտի նախապատրաստության փուլ:
- Մրցախաղին լուրջ կմոտենամ, ինչպես ցանկացած մրցաշարի: Կաշխատեմ պատրաստ լինել ու լավ խաղ ցուցադրել:
- Հաճա՞խ ես Կազանը հիշում:
- Ընդհանուր առմամբ Կազանից քաղեցի ինձ անհրաժեշտ դասերը: Իսկ եթե խոսենք հիշելու մասին, ապաՙ ոչ:
- Հարցը նրանում է, որ շախմատիստներից ոմանք նշում են, որ Կազանում կայացած հավակնորդների մրցախաղերն իրենց վրա որոշակի ազդեցություն են թողել: Քո կարիերայի վրա ի՞նչ ազդեցություն թողեց Կազանի մրցաշարը, որն անհաջող էր քեզ համար:
- Ինձ թվում է, որ ազդեցություն թողել է: Դրանից հետո սկսեցի ավելի լրջորեն մոտենալ մրցաշարերին եւ հաջողությունների հասնել:
- Նախկինի պես Բեռլինո՞ւմ ես բնակվում:
- Նայած ժամանակ: Երեւանում եւ Բեռլինում: Հաճախակի Ավստրալիա եմ մեկնում:
- Իսկ հայկական լրատվամիջոցների, շախմատի ղեկավարների կողմից արդեն արձագանք եղե՞լ է:
- Իհարկե, ինձ գրում են, զանգահարում: Շատ ուրախ են: Ինձ համար էլ հաճելի է:
- Վերջին հարցը: Շախմատի օլիմպիադան քեզ համար հավանաբար տարվա ամենագլխավոր մրցաշարերից մեկն է: Ինչպե՞ս ես գնահատում Հայաստանի հավաքականի հնարավորությունները:
- Ամեն ինչ կախված է այն բանից, թե տղաներն ինչպիսի մարզավիճակում կգտնվեն: Կձգտեմ խաղալ ուժերիս լրիվ ներդրումով: Հուսով եմ, որ տղաները եւս այդպես տրամադրված կլինեն ու այս անգամ կհաջողվի մեզ լավագույն կողմերով դրսեւորել: Չնայած շատ գոհ եմ, որ մեր հավաքականը կրկին ապացուցեց, որ ուժեղագույնն էՙ նվաճելով աշխարհի չեմպիոնի տիտղոսը: